Ngoenz ndeu, gaeqlwg caeuq daxmeh daeuj gwnz diegrum henz dah ra gwn guhcaemz. Duz bitlwg ndeu hix youq gizneix guhcaemz.

Gaeqlwg yawjyawj bitlwg, raen duz bitlwg bwn yungzyubyub gig ndei yawj, hoeng, ndang benjbed bizbwd, ga daemqded, byaij loh ngauzngednged, couh naeuz: “Duzbit bizbangbang, byaij loh lumj ga’gvez nei, yakyawj raixcaix!”

Daxmeh naeuz: “Mbouj ndaej gangj vunz, boux miz boux yienghceij.”

Gaeqmeh raen miz doi haeux ndeu, couh swenj “goek goek” heuh gaeqlwg caeuq bitlwg gvaq- bae guhdoih gwn.

Gaeqlwg bak soemset, bak aj didi couh “doek doek doek” ding ndaej haeux gwn. Bitlwg bak benj youh gvangq, saex mbouj ndaej dawz haeux, ciengzciengz deng ngaem hoz roengzdaeuj aj bak conx cij ndaej.

Gaeqlwg yawj mbouj gvaq da lo, naeuz:“Baenzneix damgwn, aj bak gvangqmyangmyang.” Gaeq- meh dingq le, naeuz daeglwg de:“Daihgya guhdoih mbouj ndaej doxyiemz doxceng, aeu doxhuz doxbang cij ndaej.”

Gwn haeux gvaq le, daihgya yietnaiq guhcaemz.

Seizneix, gaeqlwg raen bitlwg youq ndaw raemx youz bae youz dauq, lij seiz mbouj seiz ndaem ndaw raemx bae saex doxgaiq gwn, gig mizyinx. De hix siengj bae sawqsawq.

Mbouj liuh, de baez roengz raemx, aenndang couh cij rox caem roengzbae, mbouj rox fouz hwnjdaeuj. De hwk ndaej swenj gouqmingh.

Gaeqlwg youq ndaw raemx yied cak yied caem roengz daej raemx bae, daxmeh de hix mbouj rox youzraemx, simgip ndaej youh swenj youh daej.

Bitlwg dingqnyi miz vunz swenj gouqmingh, nyeux gyaeuj yawjraen gaeqlwg caem roengz raemx bae, couh sikhaek youz gvaqdaeuj. Cij raen de ngaem gyaeuj baez ndaem haeuj raemx, couh ndonj daengz laj ndang gaeqlwg bae, dawz gaeqlwg daix hwnj najraemx daeuj. Gaeqlwg ndaej gouq lo. Gaeqlwg saenz- dedded naengh youq gwnz laeng bitlwg. Bitlwg naeuz: “Daegnuengx, mbouj lau, naengh onj lo!” Gaeqlwg rex maenh hoz bitlwg. Bitlwg aenndang lumj aenruz iq nei, doz ndaej gaeqlwg onjwtwt. De vad doiq nyauj dinjded de, youz daengz haenzdah daeuj, haenqrengz baez bungj, gaeqlwg hwnj haenz lo.

Gaeqlwg caeuq daxmeh cungj docih bitlwg gouqmingh. Bitlwg naeuz:“Daegnuengx, mwngz dwg mbouj dwg siengj gwn gij doxgaiq ndaw raemx? Gou bang mwngz.” Gangj sat couh roengz raemx bae.

Bitlwg ra ndaej bya iq、duznyauh caeuq gomez, couh gamz hwnj gwnz haenz daeuj hawj duzgaeq mehlwg gwn.

Daihgya youh youq gwnz diegrum guhcaemz. Yaephe, gaeq- lwg raen duzdaek mbin, couh buet bae dot, baez dot couh ndaej dawz. Bitlwg hix bae saex, hoeng, saex mbouj dawz. Baenzneix geij baez, gaeqlwg raen le, dot dawz duzdaek ndenq hawj bitlwg, naeuz:“Daeggo, mwngz gaeb mbouj ndaej dawz daek, couh suenq lo, gou dot hawj mwngz gwn.”

Bitlwg cimz gwn duzdaek, gij feihdauh geijlai rangdiemz ha!

Gaeqmeh naeuz:“Daihgya guhdoih couhdwg beixnuengx. Yienghneix doxhuz doxbang, couh gijmaz hojnanz hix mbouj lau lo.”

(Ganh Sozvwnz/甘说文 bienhoiz)