Miz vunz siengj dang boux gohyozgyah he, vih vunzlai cauhfuk; miz vunz siengj dang boux canghyw he, bang vunz yw ndei bingh; miz vunz siengj dang boux vanzbauj gunghyinz he, sawj aensingz bienq ndaej engqgya gyaeundei; miz vunz siengj dang boux yijhangzyenz he, bae daigungh saenzmaed haenx damqcaz, biengjhai gij saenzmaed ndaw daigungh ……

Simnyienh gou dwg dang boux lauxsae bingzciengz youh hungmbwk he. Mwh hwnj youwzyenz, gij lauxsae lumj dahsien simndei nei, geiq youq ndawsim gou gig maenh. Hwnj siujyoz le, gyoengq lauxsae nyinhcaen naihsim son hagseng haenx sawj gou gig gingqcungh, yienghneix, nyienhmuengh dang lauxsae couh youq ndawsim gou didngaz lo.

Danghnaeuz gou dang lauxsae, itdingh mbouj baebingz saekboux hagseng, cix dwg naihsim son de, cijdauj de, hawj de ndaej daengz engq ndei gyauyuz. Danghnaeuz boux hagseng lawz baenz bingh lo, gou itdingh rex de bae yihvusiz yawj bingh, caiq soengq de ma ranz, hawj de gamjsouh daengz gou gvensim de couh lumj dwg daxboh daxmeh gvensim de nei……

Danghnaeuz gou guh lauxsae le, gou itdingh mbouj buci haujlai cozyez hawj hagseng, sawj gyoengqde guh dwk sinsin hojhoj. Gou itdingh hawj hagseng doeg mbangj sawgovai, hawj gyoengqde lai rox cihsiz, lij hawj gyoengqde youq ndaw saedceij bingzciengz lai guh sizcenj……

Danghnaeuz gou guh lauxsae le, itdingh mbouj ragdangz. Gij goq gou itdingh gangj ndaej gig sengdoengh, hawj hagseng cungj gyaez dingq, dingq mbouj mbwq……

Danghnaeuz gou caen ndaej dang lauxsae le, gou itdingh aeu gij cihsiz gou rox haenx cungj son hawj gyoengq hagseng.

（seiq nienzgaep Yangz Siucenh）