Mbanjgaeuvaiz youq cungq- gyang Vanzgyangh Yen Mingzlwnz Cin, liz yienhsingz 42 cienmij, dwg diegbya Gahswhdwz. Mbanj- gaeuvaiz dwg gizdieg faex heuloeg, yangjgi lai he, dwg aensuen guhcaemz guh’angq gyoengqvunz.

Ngoenzciet gozging, daxboh、daxmeh daiq gou bae Mbanjgaeuvaiz guhcaemz. Dou naengh diemj lai cung ci, daeuj daengz Mbanjgaeuvaiz gou gaenq siengjmuengh haemq nanz haenx.

Baez yamq haeuj Mbanj- gaeuvaiz, raq heiq homfwd he ci gvaqdaeuj. Caiq byaij haeujbae, baenz go baenz go faex sangsang daemqdaemq, loegyauyau, loeg ndaej dwggyaez, loeg ndaej ronghcingx, loeg ndaej singjsien, hawj vunz simsangj simsoeng. Mboujdan dwg saekloeg bw, baihndaw lij gap miz saekhoengz, yienh ndaej cibfaen gyaeundei, hawj vunz simmaez.

Dou daeuj daengz benq faexcuk ndeu, mbaw faexcuk iqetet, rumz ci gvaqdaeuj, faexcuk bibuengq, mbawfaex yiengjsasa, fat heiqhom singjsien okdaeuj. Faexcuk daiq dou byaij baenaj, byaij coh dieg engq laeg bae. Neix dwg aen luegbya laeg ndeu, gizneix faexcuk geq sang daemx mbwn. Rag gofaex loh ok- daeuj vax rinbya gaenjgaenj bae. Ganjfaex genggwt, gogaeu doxheux doxrag doxlienz, gij faex neix dwg ciuhgeq louz roengzdaeuj. Ndaw lueg seiz mbouj seiz miz sing roeg cienz daeuj, gyoengq roeg miz mbangj youq gwnz nyefaex douh, miz mbangj youq gyangmbwn mbin, sing roeg couh lumj diuz go ndei dingq ndeu.

Dou youh gyavaiq yamqdin, daeuj daengz giz raemxdiuqdan. Gou yawjraen baihnaj miz mbaw liemz- raemx hungmbwk ndeu, “vavava” daj dingj bya bu roengzdaeuj, venj youq gwnz dat. Raemx doek youq gwnz rin sinz hwnj varaemx iq, youq laj ndit ronghmyanmyan, ndeiyawj dangqmaz. Laj din liemzraemx, sinz hwnj varaemx hung duj baenz duj, raemx sinz hwnjdaeuj baenz hoenz baenz mok hausagsag.

Mbanjgaeuvaiz caen gyaeundei ha, caen dwg diegsien gwnzbiengz! Baezlaeng gou lij ciengz daeuj gizneix guhcaemz.

（指导老师：罗 凤）