2014 nienz 10 nyied 26 hauh, gou camgya Daengx Gih Daihsam Gaiq Siuj Hagseng Yungh Byauhcunj Vahcuengh Doxdax Gangj goj, gou youh gaenjcieng youh sim’angq. Aenvih gou caengz camgya gvaq daengx gih doxdax gangj goj, lau gangj mbouj ndei, ndigah mizdi gaenjcieng. Hoeng, ndaej camgya cungj hozdung neix, hawj swhgeij ndaej daengz donlen, gou youh gig angq.

Youq ndaw hoihciengz doxdax gangj goj, comz miz vunz gig lai, miz boux senjsouj camgya doxdax、miz bingzveij lauxsae、miz bohmeh hagseng caeuq gyoengq doengzhag yawj, gou gig vaiq couh yungz haeuj cungj heiq angqyangz neix bae.

Seizneix, boux cujciz senhbu doxdax hainduj lo. Boux gangj daih’it dwg boux doengzhag it nienzgaep ndeu, de gangj aengoj dwg《Lwg Mou Biz Daej Lo》. Gaej yawj de nienzgeij saeq, de gangj ndaej lij mbouj ca bw. Lwnz daengz gou hwnj daiz gangj lo, ciuq lauxsae gaxgonq gangj, gou daihdaih fuengfueng byaij hwnj gwnz daizgangj bae, ndwn youq gwnz daiz. Muengh lwgda bingzveij lauxsae cim yawj gou haenx, ndawsim gag roxnyinh gaenjcieng, sim diuqbubbub, lumjnaeuz cungj yaek diuq hwnj conghhoz daeuj, angjfwngz hix miz di dumz lo. Yaepyet lumz aengoj gou yaek gangj haenx lo. Seizneix, Cinz lauxsae yawj daengz gou dwg yienghneix gaenjcieng, couh daengj mehfwngz hwnjdaeuj, lwgda lumjnaeuz cingq gangj: “Gaej lau, aeu doiq swhgeij miz saenqsim, mwngz dwg boux lwgnyez ak ndeu.” Yawj daengz lwgda unqswnh caeuq gujli lauxsae, aensim gou cugciemh dingh roengzdaeuj. Gou sup gaemz heiq raez ndeu, dawz di dungcoz gaxgonq bwh haenx gya haeujbae, caj gou raeuzred dawz aengoj gangj sat, laj daiz yiengj hwnj sing bekfwngz goksasa.

Baez doxdax gangj goj neix lij gangj miz aengoj《Aen Vanjfaex Ndeu》、 《Gou Dwg Mbanjcuengh Samcej Iq》、 《Mui Gik Cawx Gva》 、《Lwg Hozloz》daengjdaengj, daihgya gangj ndaej cibfaen cingcaij, gou dingq ndaej haeuj rwz dangqmaz. Daegbied dwg senjsou iq itnienzgap gangj《Duzguk Mbouj Miz Heuj》seiz, hag duzguk caeuq manaez gangjvah, hawj daengx ciengz vunz cungj riuhaha hwnjdaeuj.

Baez doxdax gangj goj neix, yienznaeuz gou cij ndaej daihsam mingz, hoeng gou gig angq, aenvih gou daj gyoengq doengzhag wnq biujyienh ndawde hag ndaej doxgaiq gig lai, gou itdingh hagsib gyoengqde, baezlaeng gou biujyienh itdingh engq ndei.

（指导老师：陆银核）