Cit ien baenz menhsingq dungx in gij saeh neix raen lai lo. Yenzyinh miz sam aen fuengmienh: It dwg nizgujdingh ndaej hawj sailwed laj nemmuek aendungx sousuk、noh gaenjcieng sousuk, cauhbaenz nemmuek lwed noix、yangjgi noix, i nemmuek aendungx mbouj caezcienz. Ngeih dwg nizgujdingh yungzheih hawj youhmwnz gvazyozgih aendungx soenglon, raemxmbei lae doxdauq, raemxmbei ndaej buqvaih gij huq laengzdangj nemmuek aendungx, yinxhwnj nemmuek naeuh dai、baenzin. Sam dwg cit ien ndaej hawj aendungx lai noddoengh、coi veisonh iemqok demlai, mwh gij huq laengzdangj nemmuek aendungx deng buqvaih le, veisonh youh sonjhaih nemmuek aendungx engq youqgaenj.

Linghvaih, ciengzgeiz gwn caz gwd、gwn gahfeih, gwn gijgwn daiq ndat、daiq gyoet, ciengzgeiz gwn yw ahswhbizlinz, nemmuek aendungx hix yungzheih deng sieng, yinxhwnj baenz menhsingq dungx in. Vunzbingh donh aek baihgwnz in- yebyeb、ciengq in、aek rim、 wk heiq caeuq mbouj ngah gwn doxgaiq. Naengh fatyienh ndaej caeux youh cizgiz bae ceihyw, dingzlai dwg yw ndaej ndei, danhseih hix miz 1% daengz 3% vunzbingh gojnwngz rox fatseng aiz bienq.

Vihneix, genyi daihgya guhbaenz aen sibgvenq ndei ndeu, boux yinx cit ien ceiq ndei dwg gaiq ien. Gwnndoet aeu miz gvilwd, siuj gwn gijgwn gyoet lai、ndat lai caeuq gijgwn manhget. Gij vunz goengnaengz aendungx mbouj ndei haenx, wng caenhliengh noix gwn yw ahswh- bizlinz、yw siu in. Linghvaih, aeu baujciz simcingz vaiqvued. Genyi boux baenz menhsingq dungx in moix 1 daengz 2 bi guh veiging genjcaz baez ndeu, doiq giz binghbienq lai guh gamcaek.