Ngoenz singhgiz, gou cingq youq ndaw ranz yawj saw, sawqmwh dingqnyi sing hemq:“Siujcah, gou dwg mehgux mwngz, hai dou vei！” O, dwg mehgux ma lo, youh gojyij naengh ci bae youz lo. Gou angqfwngfwng diuq hwnjdaeuj, daj gwnz laeuz buet roengzdaeuj.

“Nget” sing ndeu, dou hai lo. Cijraen mehgux、augux riunyum- nyum ndwn youq baihnaj bakdou, ndaw fwngz riuj miz daeh hung daeh iq. Gou bae got mehgux, hoeng lwgda cix yawj seiqhenz: Baenzlawz cijmiz cidienhdoengh ne, ci’gyauz- ceh augux bae gizlawz lohne? Gou gipmuengz cam: “Ci’gyauzceh sou ne？Dwg mbouj dwg deng caeg bae lo?” Mehgux yungh fwngz vixvix cidienhdoengh naeuz: “Gyaq neix mbouj dwg ci dou ha.” Gaxgonq gyoengqde ma ranz, hai ci’gyauzceh daiq gou bae youz，gou naengh youq ndaw ci lumj mbin ityiengh, geijlai vifung ha! Hoeng baezneix cix ……hai!

Mehgux itmienh ndenq aen makbingzgoj hawj gou, itmienh naeuz:“Gwn makbingzgoj, gig ndei gwn bw!” Hoeng gou mbouj angq saek di naeuz：“Mbouj gwn! Mbouj gwn! Gou bae guh cozyez lo.” Mehgux ganjgip riengz gou byaij haeuj ndaw rug, najsaep dwk naeuz：“Siujcah, ci mbouj deng caeg law，ci lij ndei ne. Dwg dou vihliux vanzbauj, mbouj siengj hai ci ma.” Gou han naeuz：“Vanzbauj hix mbouj aenvih sou gyaq ci ndeu ma ranz baez ndeu couh deng yingjyangj ba! Mwngz dwg boux youq rog guhhong, augux youh dwg lauxbanj, gwih aen cidienhdoengh ma, geijlai saetnaj ha!” “Siujcah, mwngz loek lo, seizneix gyoengqvunz gwndaenj ndei lo, haujlai vunz cungj cawx ndaej ci lo, danghnaeuz baez bae gizlawz cungj hai ci bae, yaek yungh geijlai youz、baiz ok geijlai heiquq, mwngz rox lwi？Caiq gangj boux- boux cungj lumj mwngz baenzneix siengj, vanzging raeuz yaek bienq ndaej baenzlawz yiengh ne？Nanz- dauh mwngz nyienh ngoenzngoenz cungj gwndaenj youq ndaw heiqhaeu heiquq ha？ Raeuz wnggai mbaet yungh nwngzyenz, baujhoh vanz- ging.” Dingq mehgux gangj gij vah neix, gou fwt singj hwnjdaeuj, ngaekngaek gyaeuj naeuz: “Mehgux, gou rox lo, raeuz cungj aeu baujhoh vanzging.” Mehgux yawjyawj gou, riu lo.

Gyoengq doengzhag, raeuz aeu daj swhgeij guh hwnj, daj seizneix guh hwnj, caez daeuj gvensim da- swyenz, caez daeuj baujhoh vanz- ging, caez daeuj baujhoh mbanjranz gyaeundei raeuz!

（指导老师：罗凤）