Moix baez bae cawx doxgaiq, gou cungj cangguh bouxmizcienz, cam gyaqcienz le couh mbon ngaenz cawx, raen daengz bouxgai caeg riu, ndawsim mingz rox gyaqcienz heuh sang lo, hoeng couh cuengq mbouj roengz danaj swhgeij, cijndaej mbaetsing ndwnjheiq, hawj vunz seizbienh gwn.

Miz baez ndeu cawx doxgaiq, gou roxnyinh mbouj gangjgyaq vei lai lo. Yienghneix couh siengj daengz gangjgyaq lo.

Youq gwnz bouqdan, gou raen miz haujlai soujbyauj gig ndei, yienghceij caemh hab’eiq, couh siengj cawx, yawj gyaqcienz — 88 maenz, mbouj bengz, naengz souh ndaej, ndawsim cingq buenzsuenq, sawqmwh dingqnyi miz vunz cam:“Siuj baengzyoux, mwngz siengj cawx lwi?”Dwg lauxbanj cam gou. “Gou﹑gou﹑gou yawjyawj, gojyij cienh di lwi?” “Mwngz aeu couh 80 maenz.” “Lauxbanj, lij noix lwi? Mwngz yawj gij byaujdai, gij bien gim……” Gou caenhliengh gangj gij mbouj ndei aenbyauj, gyaqcienz youh at daengz 70 maenz lo. Cawx lwi? Gou youq ndawsim cam swhgeij. Caengz cawx, caiq gangjgangj gyaq. “Lauxbanj, 66 maenz ndaej lwi? Mwngz yawj gou dwg hagseng, bohmeh ra cienz mbouj yungzheih……” Gou cingq gangj mbouj dingz, lauxbanj mbouj naihsim lo, naeuz: “66 maenz couh 66 maenz!”

Gou ra ndaej soujbyauj habsik, gyau cienz le, byaij ok bouqdan. Cingq youq seizhaenx, baihlaeng gou cienz daeuj coenz vah lauxbanj ndeu: “Caen boiqfug boux hagseng neix.” Gou sawqmwh naj hoengzfwdfwd. lauxbanj yawj ok gou mbouj ndei eiqseiq, riu naeuz:“Mwngz gaej mbouj ndei eiqseiq, gangjgyaq youh mbouj dwg raen mbouj ndaej vunz, bouxgai hai ndaej gyaq, mwngz couh vanz ndaej gyaq.”

Lauxbanj gangj gij vah neix gig deng, caen dwg bw, gaxgonq gou cawx doxgaiq baenzlawz mbouj gangjgyaq ne?

（指导老师：陆春梅）