Dwnggvangj dwg aen dadui liz Liengzdungz mbouj gyae ndeu, ok sae’gva lai. Veiz Gozcingh cungj haenh sae’gva Dwnggvangj youh hung youh van youh baenzcaeux. Baezneix de okbae, youq Sanghaij ndaej cimz gij sae’gva Guengjdoeng, youq Denhcinh youh ndaej cimz gij sae’gva Baujding, laihnaeuz feih、saek、aen、gyaq gij fuengmienh neix, cungj mbouj beij sae’gva Dwng- gvangj ndei. De daegdaengq daiq le geij aen sae’gva Dwnggvangj daengz Sanghaij, hawj Cinz Bihyenj caeuq Cauz Dizciuh daengj vunz cimz le, gyoengqde cungj haenh ndei. De lij caeuq gij dungzci Diegbanhsaeh Guengjsae Capyouq Sanghaij haenx doxging, laihnaeuz sae’gva Dwng- gvangj danghnaeuz ndaej yinh haeuj Sanghaij, mbouj lau gai mbouj doek. De heuh Ho Yiyenz caeuq Yenveij Vujmingz doxyaeng, baij vunz bae Dwnggvangj diucaz gij namh、dienq- heiq caeuq gij gingniemh ndaem sae’gva dieg haenx, yawj ndaej youq dieg wnq ndaem caeuq doigvangq lwi, muengh ndaej demgvangq dieg- ndaem, ndaej baenzbae ok, gai hawj diegrog.

Liuzyangj ndaej ndwen lai le, aenndang de gaenq ndeidauq haujlai. Ndwen 9 ndawcib, de youh bae Baekging caeuq Gyauz Yaujgvangh doengzcaez camgya Hoih Hong Cunghyangh.

Mwh hai hoih, Veiz Gozcingh cingj cunghyangh anbaiz seizgan, dingq Guengjsae gyoeblwnh gij cingzgvang guh hong bwhhoenx caeuq gij fueng’anq gviveh guh goengloh reguek, Couh Wnhlaiz cungjlij doengzeiq de lo. Cinz Yinggih ngamq bae camgya gij hozdung angqhoh Sinhgyangh Veiz- vuzwj Swcigih laebbaenz 10 hopbi haenx dauq daengz Baekging, caemh doxcaeuq camgya gyoeblwnh. Veiz Gozcingh raen mbaw deihdoz Guengjsae gyoengqde daiq bae haenx iq lai lo, lau miz mbangj saeh nanz gangj ndaej cingcuj, goengdaeuz Cunghyangh saemjcaz goj mbouj fuengbienh, Cinz Yinggih cix caeuq gij dungzci Diegbanhsaeh Guengjsae Capyouq Baekging haenx lienzhaemh guh le mbaw deihdoz Guengjsae genjheih lai hung ndeu okdaeuj. Gij goengdaeuz daeuj dingq gyoeblwnh haenx cawz miz cungjlij le, lij miz goengdaeuz cunghyangh Ho Lungz、Lij Senhnen fucungjlij caeuq Loz Suigingh canhmouz cungj- cangj. Loz Suigingh mboengqgonq bae Guengjsae ngonzcaz gvaq “hwnjguh sam sienq”. Cunghnanzgiz Dauz Cu caeuq Lij Yizcingh、Couh Gvanghcunh caemh daeuj camgya hai hoih.

(caengz sat)