Dujva hoengzsien rwi gyaez douh,

Ranzmbanj baenzfouq hek daeuj lai.

APEC hoihhung Baekging hai,

Guek raeuz hwnj daiz ciengq heiq hoengh.

Guh duz roegdiet hwnj mbwnsang,

Caux aen ruzhang lumh daejhaij.

Laj mbanj ndaw singz bienqvaq lai,

Cungguek byaij haeuj seizdaih moq.

Ranz roh ndaundeiq bungz fwn raq,

Vaq vaih loh ga nae ngamq nit.

Geijlai banlaux dawz mingh vut,

Hojnanz guekcoj yet fouqgiengz.

Gwnz dah gyaq giuz ndei byaij loh,

Ndaem hung go faex ndaej naengh liengz.

Laeb ndaej minzcuj caux vwnzmingz,

Doxhuz cauh biengz fuk mbouj gvaenq.

Gaxgonq guhhoiq song da mengz,

Seizneix hwet geng ngangx naj byaij.

Fanndang swyouz bouxboux maij,

Guekcoj daihdaih ndaej anningz.

Sou youq henz haij dou gyawj bya,

Vunzraeuz caezgya doengz siengj- muengh.

Minzcuz bingzdaengj guekcoj huengh,

Beixnuengx cuengqsim gvaq ngoenz ndei.

Najdoiq faplwd gangj goengcingq,

Mbouj dawz sengmingh faen gveiq- cienh.

Haep lau vunzyak hoh bouxsienx,

Fap caeuq gienz cienz mbouj doxvuenh.

Daezgangj daudwz funghsang moq,

Bungz nanz bungz hoj daihgya bang.

Faplwd lumj gimq venj gwnzsang,

Ingjciuq fangzgvaiq nanz ok congh.

Gyaez guek gaej aeu gangj vah- hoengq,

Daihgya simdoengz caux saedceij.

Doxyaeuh doxnyaek mbouj doxndei,

Vwnzmingz sevei nanz saedyienh.

Vunz lai rom fwnz feiz dawz haenq,

Bouxboux gaenx guh ranz mbouj gungz.

“Haedsim gyaciz” caux vuenyungz,

Siengjmuengh Cungguek loq baenz saed.