Gyoengqvunz seizneix caen rox yiengjsouh lai lo, danhfanz guh gijmaz cungj sienq siengj daengz baenzlawz hawj swhgeij lai ndaej yiengjsouh di. Vihneix, haujlai doxgaiq ndei seizgonq cienz roengzdaeuj haenx, daengz seizneix lienz gij ngaeuz hix mbouj raen lo. Neix dauqdaej dwg gij saeh ndei ne, roxnaeuz dwg gij saeh mbouj ndei ne. Gak boux miz gak boux siengjfap, gangj boux miz gangj cungj gangjfap. Hoeng, baez siengj dwg gaiq soujgaen youq caet betcib nienzdaih gig riuzhengz haenx, dauq hawj gou dauqngeix gaiq soujgaenq seizhaenx dangqmaz.

Geiq ndaej youq caet betcib nienzdaih seizhaenx, gaiq soujgaen dwg cungj saenfaenh siengcwngh, hix dwg saenzcingz saimbwk. Ndaw daeh bouxlawz miz gaiq soujgaen ndeu, bouxhaenx couh dwg miznaj dangqmaz. Aenvih, gaiq soujgaen haenx gig hojnaengz lwnhgangj bouxcawj dwg vunz gijmaz, roxnaeuz lwnhgangj bouxcawj haenx miz duenh goj maezvunz ndeu. Ndigah, gyoengqvunz okdou bae gyae ndaw daeh cungj daiqdawz gaiq soujgaen ndeu, couh lumj gyoengqvunz seizneix baez okdou lumz mbouj ndaej daiq soujgih youq lajndang, gawq fuenghbienh swhgeij caeuq vunz lienzheih, engq yienh’ok saenfaenh swhgeij.

Mbouj rox daj seizlawz hwnj, soujgaen youq ndaw saedceij gyoengqvunz raeuz siusaet bae lo. Ndaej yienghneix gangj, seizneix, yaek ra ndaej gaiq soujgaen ndeu, couh hoj lumj daengz gwnzmbwn mbaet ndaundeiq nei. Youq caet betcib nienzdaih seizhaenx, ndaw daizgvih sanghden, dauqcawq cungj baij miz soujgaen gai, vava loegloeg, hawj vunz yawj ndaej dava bae, gaiq soujgaen guh ndaej gyaqciq dangqmaz, gyaqcienz hix mbouj bengz, maenz lai geij gak cienz gaiq ndeu, cijaeu mwngz yawj haeujsim siengj cawx, caih mwngz bae senj. Danghnaeuz cawx ma gag yungh, cawx gaiq cienh di goj ndaej, danghnaeuz siengj soengq bouxyoux ndei, couh cawx gaiq bengz di soengq guh saenzcingz. Bouxyoux ndaej daengz gaiq soujgaen soengq hawj haenx, ndawsim diemzsisi, gwnznaj riunyum rongh- lwenq, angq baenz ndwen baenz bi. Baez bungz vunz cix nyaenx mbouj ndaej sikhaek daj ndaw daeh yut ok gaiq soujgaen daeuj angj baez ndeu, hawj vunz rox swhgeij gaenq miz youxndei lo. Youq seizhaenx, boux vunz ndaej yawj haenx hozhaenz simlangh, nyaenx mbouj ndaej swhgeij hix vaiq miz bouxyoux ndeu, soengq gaiq soujgaen swhgeij cij ndei. Gaiq soujgaen couh dwg yienghneix nyex vunz gyaez de, nyex vunz siengj miz de.

Gaiq soujgaen baenzneix ndei, vih gijmaz seizneix cix caiq ra mbouj raen gij ngaeuz de. Laxlawz, daj goujcib nienzdaih doxhwnj, gyoengq- vunz raeuz fatmingz cungj doxgaiq ndeu daeuj dingj soujgaen lo. Cungj doxgaiq neix heuhguh ceijgaen. Ceijgaen dwg yungh raemxyieng faex guh baenz, aenvih bau ceijgaen gyaqciq youh itet, fuengbienh vunz dawz youq gwnz ndang, engq aenvih ceijgaen yungh baez ndeu couh vutvak bae, mbouj yungh lumj soujgaen yungh baez swiq baez, vunz roxdaengz mazfanz lai, vihneix, gyoengqvunz gyaez yungh ceijgaen couh yied daeuj yied lai lo. (caengz sat)