Ranzmbanj gou youq cungq- gyang Gvangjsih. De couhdwg Liujcouh “bya heu raemx saw dieg seuq” haenx.

Mboujlwnh mwngz daj baih lawz haeuj Liujcouh bae, mwngz cungj gamjdaengz baenz goengq baenz goengq byaheu caemj haeuj da daeuj. Doenghgij ndoi lingzlingz singsing soengz youq henz Dahliuj- gyangh haenx, lumj aenraet youq seizhah gyanghaet fwn doek gvaq le maj okdaeuj nei, gij ndoi neix youq ndaw geh heuloeg maj okdaeuj, yienznaeuz mbouj lienz baenz meg- bya, hoeng de cix lumj dahsau namzfueng nei saundei hawj vunz simmaez.

Dang mwngz ndwn youq dingjbya Byayizfunghsanh, couh yawj ndaej raen daengx aen singz Liujcouh, singz Liujcouh lumj aen batva gyaeundei, ndaw batva ceiq gyaeundei haenx dwg diuz Dahliujgyangh. Dahliujgyangh van bae ut dauq, de lumj dahsau gwnzmbwn foux diuzsai ndeiyawj nei foux hwnj foux roengz, youh lumj duzlungz mbin neix youq ndaw singz mbin bae mbin dauq. Naengh ruz youz Dahliujgyangh, mwngz ndaej yawjraen song hamq dah faex nywj heusau, youq laj ndit doxcanj angj gij saekheu saekloeg gyoengqde; diuz- loh song henz dah, baenz go baenz go faexliux baiz baenz baiz, gyefaex unqnem duengh roengz dah bae; ndaw raemx, bya iq baenz gyoengq baenz bang, miz mbangj cwxcaih youz dwk, miz mbangj yat hwnj naj- raemx, miz mbangj ndonj haeuj geh rin mbouj doengh; najdah roegenq mbin bae mbin dauq, aenbak heuh cici caca mbouj dingz, lij seiz mbouj seiz bek najraemx. Henz dah, miz sam haj boux vunz epbya youh baenz lingh cungj funghgingj he.

Liujcouh bya heu raemx saw haenx gaenq mbouj dwg dieg fwz dieg hoj ciuhlaux lo. Gizneix miz minzcuz funghcingz; miz yw “Ginhsangjswj Houzbauj”, miz yaz- gauh “Liengjmencinh”; miz caux giceh、gangdiet gihdi; miz Auyin gvanginh……vanzlij dwg aensingz daengx guek vwnzmingz ndawde aen ndeu, dwg aensingz luzva senhcin daengx guek, dwg aensingz lijyouz maenhndei Cungguek……

Liujcouh dwg diegcoj gosien Liuz Sanhcej, nyienh mbanjranz gou youq ndaw singgo “Liuz Sanhcej” yied daeuj yied goksag.

(LiujCouh Si Dunghvanz Siujyoz sam nienzgaep Liengz Swjyi)