Miz vunz cam, youq ndaw ciuhvunz bouxvunz seiz lawz ceiq vaiqvued? Dwg gauj ndaej cingzcik ndei? Dwg miz gijgwn ndei gwn? Roxnaeuz dwg seiz guhcaemz? Danghnaeuz cam gou, gou couh mbouj lawq saek di naeuz——dwg seiziq.

Seiziq dwg seiz simsoh gvaigvet, dwg seiz mbouj miz youheiq sing riugaekgaek, miz gij geiqndaej gou dijbauj nanzlumz haenx.

Bi haenx gou cij ndaej seiq bi, daxboh daxmeh daiq gou bae ranz daiq, caeuq daxdaiq youq duenh seizgan he, aengoj hag gaeqmeh ok gyaeq couh daj neix hainduj.

“Godoek godoek godoek”, duz gaeqmeh he ngiengx gyaeuj enj aek byaij youq ndaw rungz. Sawqmwh, de dingz roengzdaeuj, ga miz di vangoz, caekhaex loq saenq mbat he, aen gyaeq lumj gaemxgiemz hung he ringx okdaeuj. Gou aj bak daengx da, mwnhsaeng yawj aen gyaeq haenx.

Gou roxnyinh gig geizheih, couh dwg gij geizheih neix hawj gou hix ndiengq aen caekhaex hwnj, gungj aenndang, maeuq roengz, itmienh byaij bae byaij dauq, itmienh yungh rengz “w—— w——”.

Daxdaiq dingqnyi gij doengh- danh neix, cungj mbouj gib uet raemx gwnz fwngz bae, vaiqvet buet okdaeuj, umj dawz gou buet haeuj diengzhaex bae.

Daxdaiq cuengq gou roengz, duet diuzvaq gou. Daxdaiq guh gijneix gingqyienz baenzneix vaiq- dangq, gou cungj caengz fanjying gvaqdaeuj. Caj daengz gou fanjying gvaqdaeuj, gou gaenq roxnyinh vutnaj dangqmaz, “ngw——ngw——”daej lo. Gou daej dwk naeuz:“Gou…… gou mbouj dwg ok haex……gou dwg hag……hag gaeqmeh ok gyaeq hane, ngwngw……!”

“Haha, dahniq huk, mwngz baenzlawz ok gyaeq ndaej ha, huk lai lo. Haha!” Daxdaiq sien dwg ngawh mbat he, yienzhaeuh riuhaha, riu dwk gou cungj naj nding lo.

Gienh saeh neix, yienznaeuz fatseng seizgan dinj, hoeng cix louz youq ndawsim gou ciengxlwenx mbouj lumz de, neix dwg gij saehyinx seiziq gou ha!

(roek nienzgaep Yez Cwnzveih)