Youq ndaw ndoengfaex caem- dingh, miz haujlai doenghduz youq gizneix gwn youq. Duz roeg- gyaeujmeuz hwnj sat yebanh le hainduj ninz lo； duzroeg ndwn youq gwnz nyefaex ciengq gij go ndeidingq; duzloeg youq ndaw ndoeng angqyangz buet dwk……daihgya cungj nyaengq guh gij saeh swhgeij. Sawqmwh, raq sing doxceng he youq ndaw ndoeng andingh neix cauz hwnjdaeuj.

“Mwngz yawjyawj mwngz, bwn gwnz ndang cungj dwg ndaemnwtnwt, di saek gyaeundei he cungj mbouj miz, sing ciengqgo lumj sing aenlaz vaih nei, lij gamj caeuq gou beij ndeidingq!” Roegvenz dasang mbe gaiqfwed de, ndiengq rieng de hwnj naeuz.

“Dwg ha, gou cingznyinh mwngz maj ndaej gyaeundei, hoeng dan baengh baihrog gyaeundei caeuq sing ndeidingq lij mbouj gaeuq bw, aeu lumj gou nei miz aen’uk coengmingz cij ndaej, rox lwi?” Roegga menhmenh naeuz.

“Mwngz duz roegga neix, mwngz gangjgangj mwngz dauqdaej coeng- mingz youq gizlawz?” Roegvenz cam.

“Ndei, gou naeuz mwngz nyi ba: Gaxgonq, cojcoeng gou……”

“Dingz! Mwngz dauqdaej siengj gangj gijmaz lo? Gou naeuz mwngz ceiq ndei gangj genjdanh di!” Roegvenz mbouj naihfanz capvah roegga.

“Ndei, mwngz dingq gangj gvaq ‘roegga gwn raemx’ aen goj neix lwi? Aen goj neix couhdwg haenh roegga dou coengmingz!”Roegga ndaeng- ndiengq ngiengx aen gyaeuj de hwnj doiq roegvenz naeuz.

“Mwngz……mwngz” Roegvenz gip dwk cungj gangj mbouj ok vah lo. “Neix cij dwg haenh cojcoeng mwngz, youh mbouj dwg haenh mwngz!”

Roegga dingq roegvenz baenzneix gangj, sawqmwh hozndat dwk naeuz: “Gyonj daeuj gangj, roegga dou cij dwg doenghduz vunzloih ceiq gyaez haenx!”

“Mbouj cinj mwngz luenh gangj, mingzmingz dwg dou roegvenz cij dwg doenghduz vunzloih ceiq gyaez haenx.”

“……”

“……”

Gyoengqde byawz hix mbouj saenq byawz, yied ceng yied haenq. Seizhaenx duz roeggyaeujmeuz deng cauz ndiu haenx menhmenh mbin gvaqdaeuj, buenq ninz buenq singj cam gyoengqde: “Sou ceng gijmaz lo? Lij hawj mbouj hawj gou ninz ha!”

“Bohlungz roeggyaeujmeuz,” Roegvenz miz laex dwk cam, “mwngz rox doxgaiq lai, itdingh rox song boux dou byawz engq coengmingz, vunzloih engq gyaez boux lawz ba?”

Roeggyaeujmeuz dingq gij vah roegvenz le, sikhaek riu lo, “Hwhw, gou laihnaeuz dwg gijmaz ne! Laxlawz sou dwg aenvih gij saeh neix doxceng ha. Gawqyienz sou baenzneix siengj rox, yienghneix gou couh naeuz sou nyi ba: Moix boux vunz cungj miz giz ndei caeuq giz mbouj ndei, mbouj miz vunz yienghyiengh cungj ndei, sou mbouj wnggai angj gij ndeicawq hawj vunz rox, yo gij yaezcawq swhgeij hwnj. Rox lwi?”

“Rox lo.” Roegvenz caeuq roegga najmong dwk ngaemgyaeuj roengz- daeuj.

Daj seizhaenx hwnj, song boux de couh baenz baengzyoux ndei lo. Ndaw ndoengfaex youh dauq andingh roengzdaeuj lo.

(Siujhuj)