Gij “cingzgvang diegnamz” de naeuz haenx, cujyau dwg naeuz Meijgoz ciemqhah Yeznanz Minzcuj Gunghozgoz caeuq mboujduenh baij feihgih bae famh gwnzmbwn Guengj- sae caeuq Yinznanz. Veiz Gozcingh dwg daj bouxbing hwnjdin, seizneix youh giem guh boux cwngveij daeuzit Gvangjsih Ginhgih, de seizseiz cungj geiq maenh aeu bang Yez dingj Meij caeuq henre ndei diegnamz guekcoj.

Yienznaeuz de dwg bae liuzyangj, hoeng de gig gvansim gij hong Guengjsae. De raiz saenq hawj Gihdangjveij naeuz, seizneix daengx guek gak dieg cungj guh hwnjbae mbouj dingz, Guengjsae bineix buenq bi gonq swnghcanj lai ndei. Seizneix, cujyau dwg gij gihgvanh dazyinx gak gaep baenzlawz haenq cuk rengz, ganjdawz hingzsi gij vwndiz neix. Raeuz miz mbangj diegfueng lingj- dauj ganbu, naiqniekniek, eiqceiq gwzming doeknaiq; miz saek song boux vunz baenzngoenz gwn imq le cixbah, mbouj doengh uk ngeix- naemj, gvaq ndaej cixsuenq. Ginggvaq guh seveicujyi gyauyuz yindung le, lij mbouj nyienh gaijndei, couh yaek diuzcingj de. Doiq gij cozfungh cij rox hemqndwi, mbouj saedcaih guh hong haenx, itdingh aeu gaijbienq de daengzdaej bae.

Veiz Gozcingh bae Bwzdaihoz liuzyangj, cujciz heuh mehyah de daiq lwgnyez caemh riengz bae, caeuq de youq baihde caez gvaq aen sujgyaj vuenyungz ndeu. Bingzseiz, cuengqgyaj le de cungj goq mbouj ndaej yiet naiq saek baez, ngoenzhaemh cungj dwg guh hong, bae gyawz ra ndaej hoengq okdaeuj buenx mehyah caeuq lwgnyez cuengqsoeng! Youq gizneix, de ngoenzngoenz bae haij youzraemx, bae haenzhaij youzbyaij, dwk binghbanghgiuz、dwk bej, lij hag saj gienzdaiqgik. Baenzneix cuengq- soeng, baenzneix guh’angq, baenz ciuhvunz de cungj nanz ndaej saek baez.

Mwh liuzyangj, de vanzlij ngeix gij hong Liengzdungz. De raiz saenq hawj Ho Yiyenz, iugouz Liengzdungz ca ndei gij hong ok haeux buenq bi laeng haenx, youq baujcingq dangbi demcanj, guh ndei hong hwnjguh goekdaej nazreih, guh baenz ok haeux ndaej okonj oklai. Doengzseiz, aeu ciuq saehsaed bonjdieg bae geiqmaeuz mbefat lai cungj gingh- yingz, caemhcaiq daegbied daengq naeuz, Liengzdungz aeu baij vunz bae hagsib gij gingniemh ndaem saegva Dwnggvangj.

(caengz sat)