“Dinghlingling……, dinghling- ling……” cingq dwg haetcaeux sam diemj buenq cung, Hang Bingjfeih cingq loq aen fangzhwnz ndei ndeu: De caeuq Goengcou doq gangjgoj doq ndoet laeuj, gangj ndaej mizyinx raixcaix, ndoet ndaej miz feih subsub. Hoeng aen nauhlingz couh yiengj- dengdeng coi de hwnqmbonq lo, Hang Bingjfeih baez dingqnyi nauhlingz yiengj, sing gyaen ninz ndaekfofo sikhaek couh dingz lo, de lumj duz byavanx fanboek ndeu daj gwnzcongz diuq roengzdaeuj, lujlaj swiqnaj satheuj le, couh daeuj daengz gwnz Gaidungzlingj, youh hainduj guhhong ngoenzmoq lo.

Neix dwg ngeihcib lai bi daeuj, moix ngoenz haetcaeux sam dienj buenq aen hengzdoengh Hang Bingj- feih gaenq sibgvenq ndeu. Aen hengzdoengh neix byajraez cix mbouj bienq. Aenvih Hang Bingjfeih dwg Hawdungzlingj doih sauq gai duicangj, dwg boux cinghgezgungh gaenq guh cungj hong neix miz ngeicib bi lo. Ngoenzngoenz banhaet seiq diemjcung hwnjban, moixngoenz guh bet diemj- cung. Danghnaeuz dwg ngoenz singhgiz roxnaeuz ngoenzciet lij laehvaih, aenvih ngoenzsinghgiz caeuq ngoenzciet nyapnyaj engq lai, gij hong gyoengqde hix deng gyanaek, banhaemh ciengzciengz aeu gyaban daengz caet bet diemj cung, mizseiz gwnzgai gij daeng rongh le youh ndaep, gij nyapnyaj gwnzgai youh miz haujlai lo, de baenzlawz sijndaej dingz roengzdaeuj? Cigdaengz dawz gij nyapnyaj cungj yinh daengz cungh- conjcan le, gyoengqde cij rag aenndang baegfodfod dauqma caeuq vunzranz doxcomz. Cungj hong neix youh uq youh haeu youh baeg, ngeihcib bi neix daeuj, gij vunzdoih de gaenq vuenh gvaq roek caet boux, mizdi vunzdoih guh le sam haj bi, mizdi guh le sam haj ndwen, cungj bae ra hong ndei guh lo. Cijmiz de, vih mbanjranz seuqset souj aen gangjvei baenz ngeihcib bi, cingjcingj ngeihcib bi!

Seizneix gwnz Gaidungzlingj doih yinh nyapnyaj Hang Bingjfeih, gaenq dwg doih dawz hoengzgeiz doxlwnz Dungzlingj cin, gyoengqde guhhong maenh’ak, cawz le moix ngoenz dawz Gaidungzlingj baet ndaej seuqsetset,lij ciengzciengz bae mbanj wnq bangrengz, lumjbaenz bineix, de caeuq gyoengq duiyenz couh bae ndaw Dahvujlaiz lauz gvaq doenghduz dai cib lai baez. Daegbied miz baez ndeu, mbouj rox boux ciengxmou lawz dawz sam duz moumeh dai gveng daengz laj Giuzsinhlungz bae, sam duz moumeh dai haenx duzduz cungj bak lai song bak gaen, gyoengqvunz fatyienh seiz, moumeh dai gaenq fat ndaem bongzbwd haeu ndaej boux- boux gaemq ndaeng bae daeuq. Hoeng Hang Bingjfeih baez ganj daengz seiz, bwnda cix mbouj nyaeuq gvaq, couh caeuq Veiz Vujgangh、Veiz Vujyaj、Lungz Veihyi daengj duiyenz soemh heiq haeu doengmbwn haenx, diuq roengzdah bae, dawz moumeh dai cang haeuj daehhung bae.“Yiya eiyo! Yiya eiyo!”Dawz moumeh dai rag daengz gwnz giuz bae, youh caiq buen hwnj ci, rag bae cawqleix lo, vih Sinhlungz yinzminz cawz bae aen haih hung ndeu. Hoeng, vihliux cawz aen haih neix, gyoengqde ok gij daigya cix mbouj noix. Yah gyoengqde rox gyoengqde bae lauz moudai, baenz buenq ndwen mbouj gamj caeuq caemhninz.

Gyoengqvunz doiq Hang Bingjfei bingzgya hix gig sang, Gujlen vwnzyidui yungh gij saehde guh caizliuh camgya daengxcin yienjheiq doxdax, ndaej daengz cingzcik ceiq ndei, dawz gij hong mbanjranz seuqset nyumx haeuj sim gyoengqvunz. Miz boux duiyiuh lauxsae heuh Veiz Cinyung raen Hang Bingjfeih ngeihcib bi ngoenzngoenz sam geng ganj seiq geng dwk guhhong, ndawsim gikdoengh dangqmaz, dienzsij le hot swz《Sihgyanghyez》ndeu daeuj haenh de:“Gwnz mbwn ndaundeiq guh daeng, gwnz dieg rongxrongx singrengz. Samgeng hwnqcongz seiq geng guh, haenqrengz guh, ligliengh caeng. Nyapnyaj soengq cangj doxcomz,yungh feiz coemh dienh okseiq. Sing haeu cawz caez fanh gya hom, byawz beij Bingjfeih engq gyaeu?”