Duzdouq diuq ndaej sang yat ndaej gyae, noucoengz gig boiqfug. Ngoenzneix, noucoengz cingj duzdouq daeuj gwnz gaiq diegrum ndeu son de buet diuq.

Songde duz ndeu son, duz ndeu hag, cingq gig nyinhcaen. Sawqmwh, “dida dida” raq sing yiengj ndeu daj gyae daengz gyawj, lij caengz caj songde singjsak, duz loegraiz ndeu fwt cung gvaqdaeuj, cadi daemh deng diuzrieng raezrangrang mboengfeng- feng duzdouq.

Loegraiz fwt raen duzdouq caeuq noucoengz, ganjgip sou din, gwnz gyaeuj doiq gaeu youh raez youh naek haenx coh laeng baez ngiengx, sup dingz roengzdaeuj.

Duzdouq gig hozndat, bungj diuzrieng raez swhgeij hwnjdaeuj rub le youh rub, naeuz: “ Mwngz miz doiq gaeu raez caeuq dauq buh va couh dasang lai luma? Luenh cung luenh daemj!”

Loegraiz najnyaenq naeuz:“Doiq mbouj hwnj, haxbaenh, aenvih duzguk yak ndeu yaek hangz gou, gou cij buet ndaej baenzneix vaiq.”

Duzdouq ndaeng baez ngwt, naeuz: “Mwngz buet ndaej vaiq? Vaiq gvaq gou lwi?”

Duz ma ndeu cingqngamj byaij daengz gizneix, dingqnyi le, couh naeuz: “Byawz buet ndaej vaiq, beijbeij couh rox lo.”

Yienghneix, duzdouq caeuq loegraiz couh doxdax buet.

Duzma guh caizbuenq, genj giz miz cazoen haenx guh lohbuet. Seizneix, duzma caegcaeg doiq duz- douq naeuz:“Diuzrieng mwngz raez lai, haengjdingh nguh doxdax, aeu sijndaej gvej bae cij ndaej.” Duzdouq couh hawj de bang raed gyaengh rieng raez ndeu bae, cij louz di goekrieng dinjdetdet.

Hainduj doxdax lo, loegraiz seiq ga raez diuqdiuq yatyat, yaep ndeu couh buet bae baihnaj lo, hoeng, daengz giz cazfaex, deng nyefaex diuzgaeu ngaeu deng gaeu lo, baenzlawz hix cak mbouj ndaej okdaeuj. Duzdouq youh yat youh ndonj, yaep ndeu couh buet daengz giz satbyai.

Duzma angqhoh duzdouq, naeuz: “Danghnaeuz gou mbouj genj gizdieg neix guh lohbuet, mbouj bang mwngz raed gyaengh rieng bae, mwngz baenzlawz ndaej hingz ne.” Duzdouq cingq bungj gyaengh rieng goenq haenx sim’in, dingq duzma baenz- neix gangj, couh mbe’mbe bak naeuz: “Gou dwg baengh bonjsaeh ndaej hingz, danghnaeuz mbouj miz mwngz, gou lij mbouj saet bae diuzrieng gyaeundei ne!” Duzma baez dingq, hozndat lo, naeuz:“Mwngz danghnaeuz miz bonjsaeh, raeuz hix daeuj doxdax ba!” Duzdouq ndaengndiengq naeuz: “Doxdax miz maz nanz, gou buet gonq, mwngz gyaep ndaej dawz gou, gou couh cingj mwngz gwn ndok.” Gangj sat couh daekeiq fwngfwng buet hwnjdaeuj. Duzma lumj fagnaq nei gyaep bae, yaep ndeu couh gaeb dawz duzdouq, de haenqrengz gamz dujrwz duzdouq, naeuz: “Ndei lo, baezneix gou ndaej gwn ndok mwngz lo.”

Duzdouq hwk ndaej saenzded- ded, swnh duzma gangjvah, haenq- rengz baez yat, ndaej duetdeuz lo. Hoeng, aenvih yungh rengz lai, de caemj laemx lo, naengbak gwnz deng bungq sieng, naengbak gwnz leg baenz song limq lo, aenrwz hix deng beng raez lo.

Daj seizhaenx hwnj, duzdouq couh baenz naengbak miz sam limq, rwz raezram, rieng dinjdet, baez raen duzma couh buet.

(Ganh Sozvwnz/甘说文 hoiz)