Youq henz mbanj gou miz diuz dah iq he, daengx bi cungj dwg sawndikndik, yawj ndaej raen daejdah cingcing cujcuj. Mwh iq, gou couh nyinhnaeuz gizhaenx dwg giz dieg ceiq gyaeundei ceiq vaiqvued.

Seizcin ciengz fwn daih’it gvaq le, doenghgij faex nywj gomiuz cungj didngaz majhung lo. Ndaw dah hix ciemhciemh nauhyied lo. Geij go nywjraemx heuoiq youq ndaw raemx cengh lumj gingq nei menhmenh diuqfoux, lumj dah sau dwggyaez he. Duzrug iq ngamq seng okdaeuj lumj aen douhau nei, doiq aen daswyenz neix gig geizheih, duzde youq ndaw raemx mbouj seiz yawjyawj gizneix muenghmuengh gizhaenx, mboujseiz bungqbungq gizneix daemjdaemj gizhaenx dwk youz bae youz dauq. Gou maij gip aeu gak cungj rin yienghceij mbouj doengz haenx baeuh roengz raemx bae, ngaeuz gofaex youq ndaw “gingq” ciemhciemh myoxmyoet lo, najraemx doenghyubyub, sinz hwnj fouzsoq naedraemx lumj naedcaw nei. Doengzseiz hix ging- doengh daengz duzbya, duzbya youq ndaw raemx doeng bungq sae daemj.

Seizhah, aenvih deng ndit dak, go- nywj naiqnuk unqnem, rumz hix dingz youq mbouj ci lo, hoeng ndaw dah cix ciuqyiengh nauhnauh yiedyied. Ndawdah nywjraemx mwncup, lumj fouzsoq saiheu nei, “nyumx” diuzdah baenz diuz dah heu ndeu. Duzrug gaenq maj ok lwgga saeqraez, gyoengqde angqvauvau youq ndaw dah ndonj bae ndonj dauq. Duzbya cix mbouj leix gyoengqde, youq ndaw dah menhmenh youz dwk, mbouj gaenj mbouj menh.

Seizcou, youq sing duzbid coi haenx daeujdaengz lo. Nywjraemx daenj hwnj buh henjgim, aeu raemxdah ingj dwk henjrwgrwg, sawj vunz simmaez dangqmaz. Geij mbaw mbawfaex loenq roengz deng rumz ci mbin’yagyag menhmenh diuq- foux, doeklaeng coemj haeuj ndaw rungj diuzdah bae. Seizhaenx najraemx vava loegloeg: Miz saek nding, miz saek henj, miz saek henjgim…… ndeiyawj raixcaix. Aen makndae henjcug he “bum” sing he doek roengz dah bae. gyoengq lwgbya humx aen makndae angqvauvau gwn dwk. Duzrug youq gizlawz ne? Yawj, gyoengqde gaenq majhung lo, doenghgij goep henz dah haenx couhdwg duzrug maj baenz.

Mbouj geijnanz, seizdoeng youh lawh seizcou lo. Naj raemxdah giet baenz nae, gou youq gwnz nae rod bae rod dauq, mizyinx dangqmaz. Miz seiz gou aeu nae dub soiq vat aen congh he, siengj yawjyawj duzbya ninz youq gizlawz.

Neix couhdwg diuzdah gyaeundei mbanjranz gou!

(haj nienzgaep Minz Yungyiz)