Ngoenzneix, gou youq ndaw suenbyaek gaeb ndaej duz biengzbeih he, gou dawz de cuengq haeuj aen bingz he bae.

Gou fatyienh duz biengzbeih neix gwnz ndang miz raizndaem caeuq raizhenj, song mbiengj maj miz doiq fwed he, mwh biengzbeih mbin lumj gyaq feihgih iq he. Aen’gyaeuj biengzbeih gig hung, lumj daenj aen mauhmozdozceh he. Doiq da luenzgyaeq doed okdaeuj haenx gig yinx vunz cimyawj. Gou geiq ndaej gou youq ndaw saw yawj gvaq, baihndaw aenda hung biengzbeih miz baenz cien baenz fanh aenda iq bw! Seiq doiq ga biengzbeih youq ndaw bingz mbouj dingz doengh bae doengh dauq, lumj dwg naeuz: “Vaiq cuengq gou okbae! Vaiq cuengq gou okbae!” Daxmeh yawjraen le, gipmuengz byaij gvaqdaeuj, naeuz: “Biengzbeih dwg non’ik, mwngz mbouj wnggai gven de youq ndaw bingz.” Aennaj gou sawqmwh nding lo, ndawsim gag siengj: Dwg ha, biengzbeih dwg non’ik, gou gaeb de daeuj, mbouj couhdwg hawj baenz cien baenz fanh duz nonhaih buetdeuz ha? Yienghneix, gou dawz aenbingz daeujdaengz bakdou ranz, hai fabingz bae, biengzbeih sikhaek mbin okdaeuj, youq byonghmbwn mbin geij gien, lumjbaenz caeuq gou doxbiek nei, gou vad fwngz coh biengzbeih, naeuz: “Caiqraen, biengzbeih, muengh mwngz lailai gaeb nonhaih, vih doenghgo guh’ok gungyen hung.” Duzbiengzbeih lumj fagnaq nei mbin haeuj ndaw rungj daswyenz bae……

(seiq nienzgaep Mungz Yiz)