Seizdoeng mbwn nityauyau, boux baenz binghnyouhdangz cawz guh ndei hong yawhfuengz le, hix aeu yawjnaek gwnndoet cij ndaej. Baihlaj gangjgangj boux baenz binghnyouhdangz seizdoeng wng haeujsim gijmaz saeh:

Gwn noix gwn lai donq. Yienghneix ndaej gamhanh hez- dangz swng sang. Gij vunzbingh dandan yungh yw diuzcingj caemh mbouj raen ndei haenx, doenggvaq baen gwn lai donq daeuj gamhanh binghcingz. Gwnndoet dwg gij goekdaej yw binghnyouhdangz, mboujlwnh bingh naek bingh mbaeu, cungj aeu yiemzgek saed- hengz gwnndoet ywbingh yenzcwz.

Gamhanh gwnndoet. Ok rog caeuq vunz gwn caeuzngaiz, aeu lwnh binghcingz hawj vunz rox. Boux baenz binghnyouhdangz buenx miz hezyaz sang、simdaeuz miz bingh haenx, wng noix gwn gyu, caenhliengh mbouj gwn bya hamz、noh hamz、byaek hamz. Boux baenz binghnyouhdangz buenx aenmak miz bingh, wng noix gwn noh caeuq gyaeq.

Caenhliengh mbouj gwn laeuj. Aenvih gwn laeuj dwg aen cujyau yenzyinh yaeuhfat baenz bingh sai simlwed he, boux ndang miz bingh gwn yw gyangq dangz seiz gwn laeuj, hezdangz couh gojnwngz daemq roengzdaeuj, hix gojnwngz rox yaeuhfat baenz binghdungz soemj dengdoeg. Danghnaeuz siengj gwn laeuj, laeujmakit ngoenz gwn 100 hauzswngh dauqlaj couh ndaej, gwn laeujbizciuj mbouj ndaej mauhgvaq 350 hauzswngh, cien- geiz mbouj ndaej gwn laeujget.

Gyoet caeuq ndat. Gijgwn miz gyoet、ndat、raeuj、liengz seiq cungj. Yingzyangj conhgyah genyi naeuz, seizhah mbwn ndat, gwn dangduhheu; seizdoeng mbwn nit, gwn danglwglimz; gwn duzbaeu aeu gwn di hingsei ndeu, gwn le lij aeu gwn boi dang raemxhing dangznding he; seizdoeng gwn nohyiengz, itdingh aeu dapboiq gwn di byaekheu、daeuhfouh、faenjsei he.

Iek caeuq imq. Gaej gwn imq lai, imq lai rox sieng dungx, iek lai rox sieng saej. Gohyoz gwnndoet, cij ndaej baujhoh bwtdaep simdaeuz gengangh. Danghnaeuz ciengzseiz seiz imq seiz iek, mboujdanh yingjyangj dungxsaej goengnaengz, ngoenz nanz le, siuhvadau lij rox ndaej bingh- menhsingq dem. Ndigah, siengj hawj ndang ndei, aeu guh daengz sam faen iek caeuq dingj sam faen nit.