Seizdoeng, gij caznding raeuj ndang ciengx dungx youh miz goengnaengz moq lo. Ciuq Yizbwnj Sezbinh Dayoz ceiqgaenh yenzgiu ndaej rox, bouxvunz moix ngoenz gwn song boi caznding doxhwnj, deng baenz liuzganj gijliz beij boux mbouj gwn caznding aeu siuj 30%. Gyoengq conhgyah nyinh- naeuz, aenvih ndaw caznding hamz miz dingj yangjva doxgaiq, ndaej hawj ndang vunz dingj ndaej bingh, ndigah ndaej dingj baenz liuzganj.

Gizsaed, caznding ndaej dingj liuzganj gaxgonq hix miz baudauj gvaq, Yizbwnj Cauhhez Dayoz yenzgiu couh fatyienh, yungh raemx caznding riengx bak hix ndaej dingj baenz liuzganj. Gyoengq gohyozgyah Meijgoz cix naeuz, yungh raemxgoenj gyoet cimq caznding goengyauq de engq ndei. Aenvih raemxgoenj gyoet cimq caznding ndaej hawj miz ik doxgaiq mbouj deng buqvaih, hawj de menhmenh iemqok. Moix ngoenz banhaet banringz gak gwn boi caznding ndeu, ndaej hawj liuzganj mbouj gamj depgaenh mwngz.