Itbuen daeuj gangj, meh- daiqndang ceiq ndei dwg youq mwh daiqndang ndaej 20 hop seiz hainduj bouj gai, aenvih riengzdwk lwgndawdungx cugciemh majhung, mehdaiqndang ngoenz siuhauq gai hix gaenriengz demlai. Hoeng aenvih dingzlai mehdaiqndang youq caengz daiqndang gaxgonq ndaw ndang couh noix gai lo, youq cungj cingzgvang neix lajde, aeu guh ndei daiqndang gaxgonq couh bwh rom ndei gai. Ndaw ndang mehdaiqndang gai cukgaeuq, lwg- nyez seng roengzdaeuj le, couh noix baenz gyanghwnz doeksaet、caeugaen、hwnj heuj ceiz、sim fanz、binghndoknunq daengj noix gai yienghsiengq, heuj caeuq goetndok lwgnyez fatmaj hix haemq ndei. Mehdaiqndang hix noix baenz gahengh caeugaen、hwet naet ga in、hohndok in、foegfouz daengj bingh, caemh ndaej yawhfuengz baenz ndok soeng ndok honz.

Itbuen daeuj gangj, gijgwn hamz gai lai cujyau miz cijvaiz、gyaeqgaeq、gijgwn duh guh、haijdai、byaekaeuj、byuk nyauh、lwgraz、maksanhcah、 bya ndaw haij caeuq byaekheu daengj.

Danghnaeuz ndaw gijgwn fouzfap muenxcuk aenndang aeu gai sihyau, ndaej youq canghyw sonyinx lajde daeuj bouj gwn. Mwh cawx gainaed seiz, aeu haeujsim canjbinj baucang gwnzde biumingz gaiyenzsu suenqfap hamz gai geijlai. Moix baez gwn gaej gwn daiq lai, ndaej dawz 600 daengz 800 hauzgwz gai baen baenz 2 daengz 3 baez gwn. Baez dog gwn mbouj ndaej mauhgvaq 500 hauzgwz.

Linghvaih, veizswnghsu D dwg aen cungyau yihsu supsou gailizswj he, mehdaiqndang mwh bouj gai seiz gaej dandog baengh bouj gwn gainaed, wng lai ok rog bae dak ndit roxnaeuz gwn veizswnghsu D daeuj bouj, baenzneix cij ndaej cingqciengz baujcwng aenndang supsou gai ndaej gaeuq.