Roeggacak dwg boux caux rongz ceiq ak ndeu. Ngoenzneix, roegga lwg、roeglaej lwg caeuq roegenq lwg guhdoih daeuj caeuq roeggacak hag caux rongz.

Raen gyoengq roeglwg daeuj, roeggacak angq raixcaix, naeuz:“Caux rongz aeu cien sim cien eiq, mbouj ndaej lau sinhoj bw.”

Roeggacak hainduj son baenzlawz caux rongz. De sien mbin bae gamz namhniu daeuj, menhmenh caij baenz aen bingj nduen ndeu, caiq loengh cungqgyang mboep roengzbae. Youh caiq bae gamz di nyefaex dinj daeuj, cuengq youq seiqhenz aen bingjnamh. Roegga lwg yawjraen gijneix, sikhaek angqfwngfwng swenj gaga naeuz:“Gou rox baenzlawz caux rongz lo! Gou baema swhgeij gag caux rongz lo!” Gangj dwk, mbouj caj bouxlawz gangj gijmaz, couh sikhaek mbin deuz lo. Yienghneix, roegga baema caux gij rongz haenx cij dwg aen gyaq yungh nyefaex dap baenz ndeu, caux ndaej ceiq yaez lo.

Roeggacak ciep daeuj youq gwnz nyefaex daz caengz namh ndeu, aeu bak dawz gij namh loengh ndaej youh bingz youh wenj, caiq gamz di nyefaex iqet raezreng daeuj loengh gungj le, cuengq youq seiqhenz rongz bae. Roeglaej lwg yawj daengz gijneix, couh angq dwk bek fwed bywngbywng, swenj cici caca, naeuz: “Gou rox lo, gou gaenq hag rox caux rongz lo!” Gangj le hix mbin deuz, gag bae caux rongz lo. Ndigah, daengz seizneix, roeglaej caux gij rongz haenx, yawj hwnjbae baihrog venj miz di nyefaex gungjngeu, hoeng, baihndaw lij cocatcat nyapnyangnyang.

Gyoengq doengzdoih cungj mbin deuz lo, hoeng, roegenq lwg mbouj vueng mbouj muengz, de caemdingh youh nyinhcaen, laebdaeb yawj roeggacak lij baenzlawz guh dem.

Roeggacak daxheiz gaenq baeg lai lo, hoeng, de baez yawj raen roegenq lwg baenzneix nyinhcaen hagsib, couh youh riengjret mbin okbae lo. De gamz di nywj unqnepnep ma, daeh di haz rozrwdrwd saeqsisi daeuj, bu ndaw rongz bae yaenzywdywd.

Roeggacak daxheiz baeg ndaej hanh lae hanh roenx, roegenq lwg bang roeggacak uet hanh. Roeggacak angq dangqmaz, doiq roegenq lwg yaepyaep da, naeuz:“Yienghneix, vuenvwtvwt raeujrubrub, aen- rongz cij suenq caux baenz lo.”

Roegenq lwg cam:“Daxheiz, gou rengz iq lai, moix bi lij daj gizgyae dauqma, miz gijmaz banhfap caux aenrongz youq ndaej nanz lwi? ”

Roeggacak haenh naeuz:“Caen dwg boux lwgnyez ndei gaenx hag youh haengj doengh uk ndeu! Ndei, cijaeu nyinhcaen naemj itdingh miz banhfap ndei.”

Roegenq lwg naemj ha naemj, de raen aenranz bouxvunz hunghaenghaeng sang- ngaungau, couh mbin haeuj laj yiemhranz vunz youq haenx bae caux rongz. Yienghneix, aen rongz roegenq yawj hwnj bae lumj aen vanj laeg ndeu, youh maenhgeng youh gyaeundei, youh mbouj deng fwn rwed, youq haujlai bi cungj mbouj vaih.

(Ganh Sozvwnz bienhoiz)