Seizcou daeujdaengz lo.

Makbingzgoj doenghbaez heuyauyau haenx aenvih dahsau seizcou daeujdaengz cix riu dwk najnding lo; baenz roix baenz roix makit heugwd haenx riu dwk aendungx cungj gyaemq lo; dahsau makgam hix aeu swhgeij dajcang dwk henjrwgrwg; couh lienz dahcej maksigloux bingzseiz mbouj haengj gangjvah haenx hix riu dwk bak dek bae.

Mbouj cij gijneix bw! Couh lienz daeggo mbawfaex hix aenvih dahsau seizcou daeujdaengz daj ndawrungj daxgoeng gofaex cak okdaeuj lo. Aenvih gaenj lai, daeggo mbawfaex lij ganj mbouj gib vuenh buhvaq. Ndigah de gig siengsim. Geij gaenj bw, dahsau seizcou seizneix couh bang mwngz vuenh geu buh henj ndaej fat ok rongh gim he. Couh yienghneix, mbawfaex youh cingsaenz miz rengz lo.

Ha, mwngz yawj! Dahcej mbawraeu youq gizgyae haenx hix daeuj doxcomz lo. Vihliux daeuj caeuq daihgya doxcomz, de lij genj geu buhnding ceiq hab ndang he. O, geu buh haenx gojnaengz lij miz di saekheuj. Aenvih mbawraeu naeuz cij dwg saeknding mbouj ndei yawj geijlai. Gijneix mbouj hab gij funghgwz de. Ndigah de lij genj di saekhenj daeuj dajdaej.

Couh youq seizhaenx, gohaeux daegnuengx hix sou ndaej laex dahsau seizcou soengq hawj haenx—— geu buhrog saekhenj he. Mboujgvaq, de mbouj ndaej daeuj caeuq daihgya doxcomz lo. Aenvih de deng bohlungz nungzminz sou ma ranz lo. Yawjraen de angqvauvau, couh mbouj bae gyauxca de luba.

Naeuz gyaez seizcin roeg ciuz va hom, gou engq gyaez seizcou ndaej sou haenx. Vih maz ne? aenvih de miz soucingz, daiq hawj raeuz angqyangz lailai daihdaih.

(Mungz Yiz)