Roegenq ranz gou miz haujlai ngoenz mbouj dauqma lo. Gou simgip dwk cam daxmeh:“Meh, roegenq lij dauqma lwi?” Daxmeh riu dwk naeuz:“Daengz seizcin mbwn raeuj roegenq couh gag dauqma lo.” Gou soeng gaemz heiq he lo.

Geiq ndaej bineix seizcin, yiemhranz ranz gou lai miz aen rongz roegenq he. Song duz roegenq mbin haeuj mbin ok, nyaengq bae nyaengq dauq. Geij ngoenz le daxmeh roegenq couh youq ndaw rongz mbouj ok daeuj lo, cij miz daxboh roegenq youq henz rongz simgaenj hen dwk. Gou buen aenlae he daeuj bin hwnj bae laeglemx yawj, laxlawz ndaw rongz miz geij aen gyaeqroegenq. Gou simgaenj caj buenq ndwen, geij duz roegenq lwg bwnyumyum faeg okdaeuj lo, gou angqvauvau aeu aen siusik ndei neix lwnh hawj daengx ranz vunz nyi.

Gou sijsaeq cazyawj, roegenq lwg daengx ndang maj miz bwnmong, song lwgda laep gig ndaet, aen bakhenj aj hung raeuh, gyoengqde cingq caj daxboh daxmeh soengq gijgwn daeuj bwnq. Daxboh daxmeh roegenq engq nyaengq lo, aenvih geij lwg roegenq neix gwn ak lai.

Gvaq duenh seizgan he, roeg- enq lwg duet geu buh mong bae, vuenh daenj geu buh ndaem, duzduz ndwn youq henz rongz saenzheiq dangqmaz.

Caj bae caj dauq, caj daengz roegenq lwg hag mbin lo, miz lwg roegenq diuqbeiz he mbouj siujsim daj ndaw rongz doek roengzdaeuj, daxboh daxmeh roegenq itmienh hemq itmienh youq gyangmbwn gvaengxgvax. Gou caeuq daxbuz yawjraen lwg roegenq youq gwnz dieg cukcak, song boux dou ganjgip buet gvaqbaez, gou yaengyaeng umj aeu duz roegenq lwg saenzdedded haenx hwnj, itmienh lumh duzde itmienh nai naeuz:“Roegenq lwg gaej lau, seizneix gou couh soengq mwngz ma ranz.” Daxbuz buen aenlae daeuj, gou umj roegenq lwg siujsim riri bin hwnj lae bae, menhmenh cuengq roegenq lwg roengz rongz bae lo.

Gou yawjraen rongz roegenq neix youh dauq ndaej doxcomz, dingq gij sing gyoengqde heuh cici caca, sim gou beij gwn dangzrwi lij diemz.

(sam nienzgaep Cangz Gizginj)