23、Youq Diegrog Liuzyangj

Bi 1965 ndwen 4 nyiedco, Veiz Gozcingh youq Liengzdungz maeuqdimj aenvih baeg gvaqbouh, binghcunghab Meijnizwjsi de fukfat, gyaeuj ngunh、da raiz、rwzokrumz, baez gwn doxgaiq roxnaeuz baez ndwn hwnjdaeuj cix rueg. De cijndaej ninz youq, mbouj gwn mbouj ndoet lij mbouj ndaej haida.

Boux Dwng Vazyouj caeuq de caemhyouq haenx, lij youq mwh Duenzguvwn Yeznanz, couh dwg boux bingre de, gig rox fat dingz bingh neix le, aeu ndaej cezdui yietnaiq, youqcaem ywbingh, cijndaej ndei dauq, sojyij caenhrengz yienq de dauqbae Namzningz, hoeng de mbouj doengzeiq deuz. Dwng Vazyouj mbouj miz banhfap, cijndaej bae ra boux duicangj doihguhhong Ho Yiyenz daeuj yienq. Ho Yiyenz caeuq dangjcihbu doihguhhong boux cingq suhgi Sung Bwnjloz、boux fusuhgi Cangh Loz doenghcaez bae yienq de, caemhcaiq yungh gij mingzeiq cihbu, iugouz de baema Namzningz yietnaiq ywbingh. Daihgya naeuz: “Gozcingh dungzci, mwngz dwg goeng- daeuz dou, guh hong dou dingq mwngz gangj, hoeng aen vwndiz neix, mwngz aeu fugcoengz gij gietdingh cujciz. Mwngz youq gizneix dou mbouj cuengqsim, canghyw caemh mbouj ndei ciuqgoq.”

De ninz ngeix yaep he le naeuz: “Geiqyienz cihbu guh ok dingz gietdingh le, gou cix baemaz ba!”

Dangngoenz banhaemh, de ninz youq ndaw ci baema Namzningz lo.

De dwg boux vunz mbouj ndaej youq mbwq ndeu, bingh ngamq ndei di le, youh baenzngoenz baenzhaemh haenqrengz guh hong. Seizhaenx gyaeuj ngunh lij caengz ndei caez, bwt youh fatyienh miz gaiqraemh. Geij boux suhgi dangjveij ndaw gih caeuq gij cangjveij wnq cungj gig dansim aenndang de, daegbied dwg aen gaiqraemh gwnz mbawsiengq haenx.

Cunghgung Cunghyangh Cunghnanzgiz boux suhgi daeuzit Dauz Cu rox gij cingzgvang le, sikhaek minghlingh Veiz Gozcingh camhdingz guh hong, heuh de bae Sanghaij guh genjcaz caeuq liuzyangj; gij hong Guengjsae youz boux suhgi cangzvu Gyauz Yaujgvangh daeuj gaem.

(caengz sat)