Youq ndaw rungh rinbya, miz aen mbanj gyaeundei ndeu heuh Nazlaiz.

Dahniq Siujyenz dwg youq gizneix sengmaj, de coengmingz lingzleih, sim gign Ndei, lwgnyez bouxlaux ndawj mbanj cungj gig maengx de.

Ngoenz singhgiz ndeu, Siujyenz daeuj daengz ndaw cin ginglaujyen, de daeuj yawj Lij daxbuz. Ngoenz singhgiz lawz miz hoengq, Siujyenz couh daeuj ginglaujyen yawj Lij daxbuz, Siujyenz guh yienghneix gaenq miz 3 bi lo. Siujyenz byaij coh daengz najcongz Lij daxbuz, naeuz:“Daxbuz, gou daeuj yawj mwngz lo.” Daxbuz dingq le angq raixcaix, cengqhai lwgda, gwnz naj loh ok riunyum, naeuz：“Docih mwngz, mwngz youh daeuj yawj gou ha, daxbuz gaenq haujlai nanz mbouj byaij ok ginglaujyen lo. Mbanjnazlaiz raeuz va hom roeg ciuz, raemxrij sawdikdik, gyaeundei dangqmaz, gou caen siengj baema ranz yawj ha!”

Siujyenz mbouj nyaenxsim lanz gij vah daxbuz, ndawsim gag siengj: Daxbuz ha daxbuz, mwngz mbouj rox, seizneix Mbanjnazlaiz bienq lo, ndaw mbanj doxgaiq doeng vut sae gvengq, nyapnyaj boengj iq boengj hung mboujmiz vunz baet; diuzmieng baiz raemx henz mbanj haenx raemx noengzdidi, haeusangsang……

“Ndei ha, ngoenz lawz mwngz siengj ma ranz yawj, gou couh heuh bouxhung daeuj ciep mwngz.” Siuj- yenz naeuz.

Biek daxbuz le, Siujyenz ngaem gyaeuj yamq din naekgywg dauq ma ranz. Daxboh lumjbaenz yawj ok aensim de, lienzmuengz naeuz: “Lwnh mwngz aen siusik ndei ndeu.” Siujyenz nyiengx gyaeuj “o” sing ndeu, youh ngaem gyaeuj lo. “Mbanj raeuz yaek guh ‘Gyaeundei Denzyangz ·Cingh- seuq Lajmbanj’ hozdung lo. Dingq gangj aeu ganbu ginzcung cungj aeu hengzdoengh hwnjdaeuj, dawz lajmbanj baet seuqsak bae!” Siujyenz dingq le, angq dwk sikhaek saetdiuq hwnjdaeuj, de gag ngeix: Ndaw mbanj seuqsak le, daxbuz ma mbanjranz couh ndaej yawjraen raemx saw faex loeg lumj gaxgonq lo, de itdingh angq raixcaix.”

Gvaqlaeng mbouj nanz, haujlai ganbu、lauxsae、ginzcung cizgiz camgya haeuj baez cinghseuq laj- mbanj hozdung neix daeuj. Gyoengqde mizmbangj roengz mboq gip mbawfaex, mizmbangj roengz mieng gvet nyap- nyaj, lij mizmbangj baet moix ranz dounaj doulaeng. Siujyenz ne, de leihyungh seiz cuengq hagcaeuz, daiqlingx gyoengq doengzhag caemh baet gyaeujmbanj. Vunzlai yawjraen le, gikdoengh dwk naeuz: “Lwgnyez ndaw mbanj caen gaenxhong roxsoq!” “Lauxsae gyauyuz ndaej ndei ha!” “Raeuz aeu yiengq lwgnyez hagsib cij ndaej!”

Geij ndwen gvaqbae lo, miz ngoenz ndeu, daxboh Siujyenz riudidi doiq Siujyenz naeuz:“Daxboh miz siusik ndei lwnh mwngz lo!” Siujyenz naeuz daxboh vaiq di lwnh de nyi. Daxboh naeuz: “Mbanjnazlaiz raeuz ndaej bingz guh ‘aenmbanj ceiq gyaeu’ Denzyangz Yen!” “Va……ndei lai lo!” Siujyenz diuq hwnjdaeuj, de buet haeuj ndaw rug, yaepyet buet ok douranz bae.

Yienzlaiz, de aeu ciusienggih bae ingj haujlai haujlai gingjsaek gyaeundei Mbanjnazlaiz, ngoenz singhgiz yaek dawz gij siengq neix bae ginglaujyen hawj daxbuz yawj……