Seizdoeng aeu haeujsim baujraeuj aenhoz, ceiq ndei dwg aeu gaenheuxhoz daeuj heux baujraeuj. Neix dwg aenvih: Baujraeuj aenhoz dwg hangh cosih yawhfuengz baenz dwgliengz、yawhfuengz aenhoz、doengjmbaq ndaej bingh he. Aenhoz dwg gizdieg ndang vunz haemq youqgaenj ndeu.

Yenzgiu ndaej rox, aenvih deng nit baenz dwgliengz、conghhoz in seiz, cawz nemmuek aenndaeng、nemmuek conghhoz fatseng mbangjgiz sailwed iq baenzin、hawj sailwed yindung goengnaengz ok luenh、lwed lae deng dimzsaek le, lij rox yinxhwnj ndoenjhoz、doengjmbaq、 gvaengh ndokleq insep dem. Menhsingq gaiduenh lij rox canjseng nyinzsei cujciz gaijbienq, mbangj lwed lae baedauq engq dimzsaek, hawj vunz okyienh gyaeuj in、gyaeuj ngunh、fanfoek doekswiz caeuq baenz binghndoenjhoz daengj dem. Baujraeuj aenhoz dwg siucawz aen’uk naetnaiq、coicaenh boujcung aen’uk cujciz baiz ok siuhauq aen diuzgen youqgaenj ndeu. Aenhoz deng nit gig le, rox hawj sailwed aenhoz laebdaeb sousuk. Baez gig nanz le, doiq bingh hezyaz sang、bingh sailwed、ninz mbouj ndaek cungj miz itdingh yingjyangj.