Aenmbwn seizdoeng nitgyoet youh hawqsauj, ndang vunz yungzheih haw nit, daegbied dwg mehmbwk, aenndang ceiq yungzheih ok vwndiz, daj neix yaeuhfat baenz cungj bingh wnq, lumjbaenz dawzsaeg mbouj swnh, saeknaj mbouj ndei, hwnj diemjraiz daengj, mboujdanh yingj- yangj gengangh, yienghsiengq hix mbouj ndei ngonz, mbouj miz cingsaenz guhhong.

Seizdoeng doiq mehmbwk daeuj gangj, ciengx ndang daegbied youq- gaenj, lai gwn di caz he ndaej hawj saeknaj engq ndei yawj, caemhcaiq miz baujgen cozyung dem. Gij caz lawz hab mehmbwk gwn ne?

1、Caz gaeujgij. Ceh gaeujgij hamz miz huzlauxbaeg doxgaiq、veizswnghsu B1、veizswnghsu C、gai、dez daengj gig lai, gwn de ndaej bouj daep ik mak、raeh da, aenvih caz gaeujgij bonjndang haemq diemz, mboujguenj dwg dawz daeuj cimq caz roxnaeuz nyaij gwn, doiq boux da saep、naetnaiq、siliz mbouj ndei cungj miz bangcoh ceihyw cozyung.

2、Cazloeg. Cazloeg ciengx ndang geij bi neix deng vunz haenh ndei, aenvih de hamz miz gij cazfwnh ndaej dingj yangjva doxgaiq caeuq veizdahming, mboujdanh ndaej siu- cawz swyouzgih ndaw ndang, lij ndaej coi hozwjmungz ndaw ndang iemqok, siujliengh gahfeihyinh ndaw cazloeg ndaej gig sinzgingh cunghsuh, hawj vunz daezsaenz, ceiq ndei youq gyangngoenz gwn, mienxndaej yingj- yangj haeujninz.

3、Caz vagut. Gwn de ndaej raeh da cing daep, ndaej caeuq ceh gaeujgij itheij cimq caz gwn, roxnaeuz caeuq dangzrwi itheij gwn, doiq so daep gaij mbwq cungj miz bangcoh.

Seizdoeng mehmbwk ciengx ndang yaugoj haemq ndei, hoeng aeu daezsingj dwg, caz ciengx ndang yienznaeuz yaugoj ndei, danhseih aeu baujciz miz aen swnghhoz sibgvenq ndei ndeu, yienghneix cij engq youqgaenj.