Baujciz ndaw rug hoengheiq riuzdoeng. Youq ndaw seizdoeng, vunzraeuz haengj gven dou gven cueng ndaetfwd, yienghneix guh rox cauh- baenz ndaw rug wyangjvadan nungzdu sang lai, danghnaeuz caiq gyahwnj heiqhanh heiqndang dem, hoengheiq ndaw rug couh engq uqlah lai lo. Bouxvunz youq ndawde rox okyienh gyaeuj ngunh、naetnaiq、rubmyaiz、mbouj siengj gwn doxgaiq daengj yienghsiengq. Linghvaih, seizdoeng dwg aen geiqciet yungzheih fatseng yizyangjvadan dengdoeg ndeu, ndigah aeu baujciz hoengheiq ndaw rug riuzdoeng singjsien cij ndaej.

Diuzcez gwnndoet. Seizdoeng gijgwn yingzyangj daegdiemj wnggai dwg baenzneix: Sup haeuj gij ndat aeu cukgaeuq. Yingzyangj doxgaiq bijli dwg aeu danbwzciz、youzlauz caeuq dansuij vahozvuz faenbied ciemq 15% daengz 23%、25% daengz 35%、60% daengz 70% couh ngamj. Sup haeuj gvangvuzciz hix aeu beij bingzseiz lai di. Lai gwn gijgwn hamz veizswnghsu C he. Lai gwn di noh doihduz caeuq duhhenj、byaekheu、lwgmak caeuq gij huq aeu cij daeuj guh haenx.

Siu yaem hoh yiengz. Seizdoeng aenvih swyenzgai yaem hoengh yiengz nyieg, rumznit ciemq haeuj, yungzheih sieng daengz heiqyiengz ndang vunz, ndigah seizdoeng ciengx ndang aeu daj siu yaem hoh yiengz guh hwnj. Daih’it dwg ninz caeux hwnq gvaiz, baujciz ninz gaeuq, hawj yisiz caemcingx, heiqyiengz mbouj deng gauxca. Daihngeih dwg baujraeuj aenlaeng. Aenlaeng dwg giz rom heiqyiengz ndawde giz ndeu, rumznit heiqrwix gig yungzheih daj gizneix ciemq haeuj yaeuhfat baenzbingh. Bouxlaux caeuq lwgnyez、boux ndang nyieg, seizdoeng aeu haeujsim bauj- raeuj aenlaeng, mienxndaej heiq- yiengz deng sonjhaih. Aenvih mbwn nit, aeu caenhliengh noix ok rog ranz bae cunzcet. Siengj okbae seiz, aeu daenj buh baujraeuj caeuq haizmad. Linghvaih, aeu daegbied haeujsim dwg dajcaemx, loq mbouj siujsim couh rox yinxhwnj siengfung dwgliengz, yaeuhfat baenz hozgyawh fatyiemz daengj bingh.

Habdangq gwn bouj. Seizdoeng mbwn nit ceiq hab gwn bouj, ndaej senj gwn di haeuxbien、haeuxyangz、megmienh、duhndaem、duhlanhdou、hingndip、byaekgep、lauxbaeg、byaek- gailanz gaemz、raetmoegngaex、nohyiengz、nohvaiz、nohgaeq、iumou、byalae、byaleix、byalienz、byadaiyiz、nyauh daengj, hawj yingzyangj doxgaiq rom youq ndaw ndang lai di, doiq heiqyiengz ndaw ndang swngfat miz bangbouj, vih bi daihngeih aenndang gangh caep roengz giekdaej ndei.

gen