De ndang reux miz di byom, naengnoh hau ngaeuz, aenda ndaem hung gig miz saenz, mwh de riu gwnz naj miz song aen cenjlaeuj gig ndeiyawj. De couh dwg Loz Gyahnih deng gou heuhguh “dahniq launyaenq” haenx.

Neix dwg aen gyanghaet seizcou fwn doeksisi he, mwh lauxsae hwnjdangz naeuz: “Gyoengq doengzhag, cingj sou yungh ‘danghnaeuz’ daeuj cauxgawq.” Gyoengq doengzhag bouxboux cungj yaengx fwngz sangvid, hoeng Loz Gyahnih cix ngaem gyaeuj roengz, aennaj sawqmwh ndingyanyan, de caenhliengh yungh saw daeuj dangj aennaj de, lumjbaenz gouz lauxsae gaej heuh daengz de. Hoeng lauxsae bienbien heuh de: “Loz Gyahnih, cingj mwngz ndwn hwnjdaeuj cauxgawq!” De sien dwg yaemhywx mbat he, yienzhaeuh cij menhmenh ndwn hwnjdaeuj, de gaem ndaet gok buh mbouj cuengq, gvaq haemq nanz seizgan, de cij yaek gangj mbouj gangj gangj ok geij cih saw daeuj, hoeng sing de iq lai, lumj duznyungz gongz nei.

“Loz Gyahnih, sing mwngz gangj hung di ndaej lwi?” Lauxsae hozswnh yawj dwk de, lumj dwg gujli de.

Seizhaenx, gyoengq doengz- hag cungj yawj coh de. Gou hix vih de simgip: Vaiq di gangj ha! Sing hung di, mbouj lau law…… gaej nyex lauxsae huj ha! Sing hung gangj okdaeuj. Gou itmienh gag siengj itmienh gaem ndaet gaemxgienz. Gvaq haemq nanz seizgan, Loz Gyahnih cij menhmenh gangj:“Danghnaeuz ngoenzcog fwn doek, raeuz couh mbouj ndaej bae cinyouz lo!” De gangj sat le, couh yungh rengz haeb naengbak de, naj nding lumj aen makbingzgoj nei.

Rog cueng fwn doek sisi sasa, lauxsae sing hung naeuz: “Gizsaed mwngz cauxgawq ndaej gig ndei, danghnaeuz mwngz sing hung gangj couh engq ndei lo.”

“Danghnaeuz ngoenzcog fwn doek, raeuz couh mbouj ndaej bae cinyouz lo!” De dauqdaej sing hung gangj okdaeuj lo. Gyoengq doengzhag yawj dwk de, daihgya bekfwngz gaksasa. De riu lo, aenbak de loh ok gij heuj hausagsag.

(roek nienzgaep Fan Yijnoz)