Duzvaiz youq ndaw naz gaenxgaenx maenhmaenh dajcae baenz ngoenz, seiz dauqma gaenq baeg ndaej daengx ndang unq liux, de ninz youq ndaw riengh baegfofo.

Duzma buet gvaqdaeuj yawj. Duzma sim’in naeuz: “Beixnuengx ha, baenz yiengh- neix sinhoj ha?”

Duzvaiz gyangz hoj naeuz: “Ai, beixnuengx, gou saedcaih daiq baeg lo, ngoenzcog caen siengj yietnaiq ngoenz ndeu. ”

Duzma biek bae lo, youq gok ranz bungzraen duzmeuz. Duzma naeuz:“Beixnuengx ha, gou haxbaenh bae yawj duzvaiz daeggo, de saedcaih daiq baeg lo, de gangj de siengj yietnaiq ngoenz ndeu. Hix nanzgvaiq de ha, bouxcawj hawj de guhhong daiq lai daiq naek lo.”

Duzmeuz cienq ndang okbae, youq rog raen duzyiengz, de doiq duzyiengz gangj:“Duzvaiz ienq bouxcawj hawj de guhhong daiq lai daiq naek lo, de siengj yietnaiq ngoenz ndeu lo.”

Duzyiengz youq ndaw gyanghongh raen duzgaeq, doiq duzgaeq naeuz:“Duzvaiq mbouj siengj hawj bouxcawj guhhong lo, de ienq hong daiq lai daiq naek. Ai, hix mbouj rox bouxwnq doiq vaiz swhgeij dwg mbouj dwg lai ndei di.”

Duzgaeq doiq duzmou gangj: “Duzvaiz mbouj siengj hawj bouxcawj guhhong lo, de siengj bae ranz wnq yawjyawj. Hix caen daiqgvaq lai, bouxcawj doiq duzvaiz mbouj in saek di, hawj de guh baenz lai hong youh naek youh uq, lij yungh bien haenqrengz fad de dem.” 

Bancaeuz, yah bouxcawj daeuj gueng duzmou, duzmou naeuz:“Bouxcawj ha, gou lwnh mwngz nyi. Mboengq neix duzvaiz doiq bouxcawj miz yigen bw, mwngz aeu menhmenh son de. De mbouj nyienh caiq bang bouxcawj guhhong lo, de yiemz bouxcawj hawj de guhhong daiq naek daiq lai daiq baeg daiq uq lo. De lij naeuz yaek biek bouxcawj, bae ranz wnq bw.”

Daengz gwn caeuz, yah bouxcawj doiq bouxcawj naeuz: “Duzvaiz siengj fanj mwngz lo, de siengj vuenh bouxcawj. Fanjgoet mbouj ndaej nyiuzcingz, mwngz naemjnaemj baenzlawz ceih de?”

Bouxcawj dingq le, hozndat raixcaix, hemq naeuz:“Doiq bouxcawj fanjgoet, gajdai mbouj nyiuzmingh!”

Ngoenz daihngeih, duzvaiz baenzneix gaenx hong, baenzneix lauxsaed haenx, deng bouxcawj gaj dai lo.

Geijlai hojlienz ha! Duzvaiz dauqdaej guh gijmaz lo? Cungj dwg vah luenh cienz haih dai duzvaiz. Daihgya mwngz cienz gou gou cienz mwngz, saehcingz cungj bienq liux lo, geijlai haih vunz ha!

(Ganh Sozvwnz/甘说文 hoiz)