Seiqgeiq lajmbanj gyaeundei raixcaix.

Seizcin, faexnywj didngaz, duznon ndiu dauq, roeg ciuz va hai. Henz loh、 gwnz ndoi lajmbanj, vacwx doxceng hailangh, mbungqmbaj youq ndaw geh va diuqfoux, baenz le baenz duj baenz duj va rox diuqfoux. Gyoengqvunz caem youq ndaw geh va, sim sangj sim soeng. Lwgnyez lajmbanj youq ndaw geh va guh’angq, buenx dwk va hom, buenx dwk mbungqmbaj diuqfoux, dohgvaq saedceij seizlwgnyez.

Seizhah, daengngoenz wenjda, ndit ndat lumj feiz, gofaex raemhrwd. Lwgnyez lajmbanj mbouj lau ndat! “Bum—bum—”diuq roengz dah bae, daengx ndang liengzngaungau. Ndaw dah raemxdah laecoco, gyoengq lwgnyez dox baeuh raemx angqvauvau. Youz raemx baeuh raemx baeg le, couh bin hwnj hamq daeuj, mbaet aeu mbaw ngaeux he hoemq youq dingjgyaeuj. Youq ndaw dah, miz seiz seizheiq ndei lij gaeb ndaej saek duz bya roxnaeuz gungq bw! Lwgnyez lajmbanj youq ndaw raemx, buenx dwk diuzdah, buenx dwk bya gungq dohgvaq seiz lwgnyezhung.

Seizcou, haeuxnaz demsou, gvamak sughenj, mbwn gvengq fwj mbang. Gyoengqvunz youq ndaw naz nyaengq dwk sou haeux. Rumzcou ci gvaq, haeux ndaw naz boekfan baenz caengz baenz caengz langhgim, neix dwg lwnh hawj vunz nyi, bineix haeuxnaz soucingz gig ndei. Aenmak gwnz faex, nding lumj feiz, lamz lumj raemx, henj lumj gim, gak saek gak yiengh, cungj demsou neix hawj vunz angqyangz vuenheij. Lwgnyez lajmbanj buenx dwk gaenxguh, byaij gvaq saedceij seizcoz.

Seizdoeng, rumznit cihuhu, naefaiq mbinyangyang. Gyoengqvunz banngoenz bae cunz caencik baengzyoux, bae naz doekceh ndaem meg, bae gunghdi guhhong. Banhaemh, miz mbangj daengx ranz vunz an’onj naengh youq gwnz sahfaz yawj densi, miz mbangj daengx ranz vunz humx youq henz daiz dwkbej, miz mbangj daengx ranz vunz ok rog bae youzbyaij lienhndang sanqsim……lwgnyez lajmbanj buenx dwk ndawranz raeujrub, buenx dwk vunzcaen gyoengqde, byaij gvaq seizhung.

Gij neix couhdwg gingjsaek seiqgeiq lajmbanj——seizcinz daiq daeuj baenz ngeu baenz ngeu va hom, seizhah daiq daeuj baenz raq baenz raq liengzsangj, seizcou fan hwnj baenz caengz baenz caengz langhgim, seizdoeng vanq roengz baenz naed baenz naed maqmuengh.

(seiq nienzgaep Maj Mingzgyauh)