□ Hoz Saubangj sij Cinz Siengzcouh Liuz Gingliuj Cinz Siengzgen hoiz

《Yinzminz Yizbau》 bi 1965 ndwen 9 ngoenz 15, yungh daeuzbanj daeuzdiuz daeng gvaq Guengjsae cingj doenghboux vunz cangh dajndaem Cauzsan daeuj ndaem nazyienghbanj gij siusik neix, caemhcaiq fatbiuj le 《Cungj Fuengfap Ndei Hagsib Gingniemh Maenhndei Ndeu》 bien selun neix, vixok dingz fuengfap neix “doiq gak dieg doxgyau gingniemh swnghcanj, daezsang suijbingz swngh- canj, miz gij cozyung youqgaenj. Gojyij hag ndaej lai caezcienz、sijsaeq、cinjgoz, ndaej hawj swnghcanj haemq vaiq ndaej yungh.”

Gij vunzguhnaz Cauzsan fouzsei yienh gij gingniemh gohyoz ndaem naz bonjfaenh okdaeuj hawj vunzguhnaz Guengjsae, daihdaih daezsang le gij gisuz ndaem haeux caeuq gij suijbingz dancanj haenx. Bi 1965, ciuq 5 aen digih gyonjgeiq, gij nazyienghbanj vunzguhnaz Cauzsan ndaem haenx, haeuxsonggeiq bingzyaenz mouxcanj 1621 gaen. Youq Vuzcouh Digih, gyoengqde miz 34 giz diemjyiengh- banj, haeuxsonggeiq bingzyaenz mouxcanj 1682 gaen, ndawde miz 13 aen diemj ndaej 1600 daengz 1800 gaen, 6 aen diemj ndaej 1800 daengz 1900 gaen, 5 aen diemj ndaej 1900 daengz 2000 gaen, aen diemj ndeu mauhgvaq 2000 gaen. Aen digih neix nazgaenban naz miz fanh lai moux, mboujnoix caemh ndaej gij suijbingz nazyienghbanj. Lumj Cinzhih Yen Sihlanz Gunghse miz 24 moux nazgaenban, bingzyaenz mouxcanj ndaej 1700 gaen. Bihaenx, daengx gih cungjcanjliengh haeuxgok beij bigonq demgya 12 ik lai gaen.

Bi 1966, gij nazyienghbanj vunz- guhnaz Cauzsan caeuq gij nazgaenban gak swnghcanjdui, youh youq gij goekdaej bi 1965 gwnzde caiq ndaej oklai dem. Daengx gih haeuxgok caemh ndaej demcanj.

Doeklaeng, aenvih deng “vwnzva dagwzming” yingjyangj, gij vunz- guhnaz Cauzsan youq bi 1966 nienzdaej gonqlaeng senj ok Guengj- sae. Gyoengqde youq Guengjsae yienznaeuz cij ndaej 2 bi, hoeng gyoengqde hawj vunzlai Guengjsae geiq ndaej gig maenh.

(caengz sat)