Miz mbangj vunz dwg Boux- cuengh, hoeng de caen mbouj rox gangj Vahcuengh; miz mbangj vunz roxnyinh gangj Vahcuengh saetnaj, rox gangj hix mbouj gangj. Lwgsau ndei Bouxcuengh Vangz Binghgen dwg boux siujyoz lauxsae Lungzanh Yen Nazdungz Cin Mbanjnazmonz ndeu, de mbouj roxnyinh gangj Vahcuengh saetnaj. De naeuz, lwg Bouxcuengh couh wnggai hag rox gangj Vahcuengh, gyaez Sawcuengh!

Miz vunz naenz Vangz Binghgen lauxsae “huk”. Gij “huk” de, mboujdanh ndaej daj de haeujsim guh gij hong Sawcuengh haenx yawj ndaej ok, caemhcaiq ndaej daj de ndiepgyaez hagseng haenx yawj ndaej ok.

1996 nienz, Gvangjsih Saw- cuengh Yozyau daeuj boux hagseng moq ndeu, mwh lauxsae cam de vihmaz haengj daengz gizneix doegsaw, de gig miznaj naeuz:“Gou dwg lwgsau Bouxcuengh, gou gyaez Sawcuengh!” Boux hagseng neix couh dwg Vangz Binghgen. Gvaq seiq bi le, Vangz Binghgen hagbaenz ma daengz Mbanjnazmonz son Sawcuengh. Doih caemh mbanj naeuz de: “Guh lauxsae, ngoenz haet ok haemh dauq, mizmaz bonjsaeh! Guh boux lauxsae Sawcuengh, engq mboujmiz bonjsaeh! Youq Mbanj- nazmonz raeuz, guh maz mbouj fatcaiz?” Vangz Binghgen riu dwk naeuz:“Gou gyaez Sawcuengh!” Doih naeuz de huk lai.

Vangz Binghgen gig angq, de gyaez faenh hong lauxsae Sawcuengh neix, guhhong gig nyinhcaen haenq- rengz. Mboujguenj dwg guenjleix ban’gaep, roxnaeuz dwg sonhag, de cungj siengj guh ndaej ceiq ndei. Youq sonhag ndawde, de roxnyinh gij doxgaiq aeu hag haenx daiq lai lo. Daegbied dwg gij conhyez cihsiz Sawcuengh haenx, engqgya wnggai aeu daezsang. Yienghneix, de youh camgya cwngzyinz gauhgauj, doeg daengz bwnjgoh bizyez bae. Doek- laeng, sonhag suijbingz de mbouj- duenh ndaej daezsang, aeundaej gak cungj gak yiengh sonhag ciengj lai dangqmaz. Aenvih de gaenx guhhong, naengzlig ak gvaq vunz, 2006 nienz 9 nyied, de ndaej dang hagdangz gyauvuzcu cujyin.

Dang gyauvucu cujyin le, Vangz Binghgen rox daengz diuzrap gwnz mbaq engqgya naek lo, de lij lumj ngamq haeuj hagdangz gunghcoz nei yinhcaen yunghrengz, yiemzgek iugouz swhgeij. Banh ndei gij saeh gij hong baihgwnz caeuq hagdangz gyau hawj haenx. 2012 nienz, Vangz Binghgen camgya Vahcuengh Saw- cuengh suijbingz gaujsi, youq ndaw gauhgiz daengjgyaep gaujsi, de gauj ndeij 71 faen.

Sonhag 10 lai bi, de mbouj ienq maz gvaq, itcig youq aen gangjvei son Sawcuengh neix haenqrengz guhhong. De lij dawz gij vwnzva Bouxcuengh cienzdungj haenx daiq hawj hag- dangz. Lumj dawz aendomq、foux faexsaux、moeggieg daengj haujlai doxgaiq minzcuz vwnzva dijbauj buen haeuj hagdangz daeuj. De naeuz, de baenzneix guh, dwg siengj hawj gij vwnzva minzcuz raeuz ciengxlwenx swnjciep roengzbae, engqgya ndaej fazcanj. Gij doengzhag youq Gvangjsih Sawcuengh Yozyau caeuq de doengzcaez bizyez haenx, cungj gaij- hangz mbouj son Sawcuengh lo. Dang bouxwnq cam de vihmaz mbouj diuq bae aen yozyau ndei roxnaeuz gaijhangz seiz, de lijdwg riu dwk naeuz: “Gou gyaez Sawcuengh! Gou sij mbouj ndaej gyoengq hagseng gizneix! ”

Vangz Binghgen lauxsae doiq hagseng ndei gvaq doiq lwg de. Gij hagseng louzsouj haenx, aenvih mboujmiz bohmeh guenj, deuzhag、hwnjdangz mbouj dingq goq、mbouj sij cozyez daengj, vih neix, hagdangz lauxsae nyapnyuk dangqmaz. Vangz Sungunh dwg hagseng ban Vangz lauxsae, daxboh gvaqseiq le daxmeh de couh okbae dajgoeng, de caeuq daxgoeng de gwnyouq. Hainduj de lij dingq gangj, menhmenh couh mbouj gyaez doegsaw, ngoenznaengz maez bae hwnj vangj. Vihliux mbouj sawj lwghag neix bienq vaih, Vangz lauxsae ngoenzngoenz yungh seiz roengzban bae cunzranz, caeuq Vangz Sungunh damzsim. Ginggvaq duenh seizgan ndeu, lauheiq gij sinhoj Vangz lauxsae gamjdoengh Vangz Sungunh lo, Vangz Sungunh mbouj bae hwnj vangj lo, dinghsim roengzdaeuj doegsaw, doeklaeng bienqbaenz boux hagseng cingzcik maenhndei ndeu.

Vangz Binghgen couh dwg boux “huk” sawj runz youh caen youh gingq neix. Gij “huk” de, gizsaed couhdwg cungj haengj guh、gyaez guh、rox guh haenx. De dawz sojmiz cinglig de yungh youq aen saehnieb Sawcuengh. De dwg boux lauxsae Sawcuengh ndei ndeu, dwg lwgsau ndei Bouxcuengh raeuz !