Sai：Ranz dahnuengx hwnj laeuz

Cingj daeuj ndei saefouh

Miz vunzgoeng lai boux

Geij ndwen couh guh baenz

Sau：Beix gangj coenz bakgvai

Nai nuengx daenj mauhlaux

Nuengx gwnheiq faufau

Muengh beixmbauq daeuj bang

Sai：Beix yaek ganj guhgoeng

Bae Guengjdoeng mbwd namh

Gud meiz aeu haeuj gamj

Yaek hamj gvaq gyoengqvunz

Sau：Beixmbauq miz bonjsaeh

Mboujcaej(yungh) bae gud meiz

Gung’yen youq gyawj ndei

Heiz(liz) gyae bouxranz mwh(sieng)

Sai：Beix mboujcaengz baenzgya

Seizlawz ra ndaej yah

Bineix ngeihcib haj

Lau gvaqndwi ciuhvunz

Sau：Cingj beix guh goengdaeuz

Bang hwnj laeuz hawj nuengx

Ndawsim geiq maqmuengh

Cuengqsim hwnj laeuz ndei

Sai：Hwnj laeuz couh hwnj laeuz

Cizlieng aeu daih’it

Mbouj guh nae dakndit

Bid hongz nae couh cieg

Sau：Ranzlaeuz daengj ndaej ndei

Nuengx sim’eiq hailangh

Bohmeh dawz vah gangj

Aeu ciengj beix gijmaz

Sai：Beix mbouj siengj yienghlawz

Hawj guhgwiz bohmeh

Ciengx bouxlaux daengz geq

Cingj gyoengqde cuengqsim

Sau：Boh hawj raeuz aenrug

Haeux cawj cug baenz am

Van’dangz lumj makgam

Sam ngoenz bak lij diemz

Hab:Song raeuz gap baenz doiq

Saeceij boiq geizlaenz

Muengxcingz san ndaej baenz

Mbouj faenliz daengznauq