Lwgmaenz mboujdanh feihdauh diemz ndei, caemhcaiq hamz miz dansuij vahozvuz、nyinzsei gijgwn、huzlozbuzsu、gyaz、meij、diet、sih daengj cib lai cungj veizlieng yenzsu dem. Ciuq caekdingh, moix 500 gwz lwgmaenz daih’iek hamz miz 11.5 gwz danbwzciz、14.5 gwz dangz、1 gwz lauz、100 hauzgwz linz、90 hauzgwz gai、2 gwz diet、0.5 hauzgwz huzlozbuzsu, linghvaih, lij hamz miz veizswnghsu B1、veizswnghsu B2、veizswnghsu C caeuq nizgoj- sonh、yayouzsonh daengj dem. Ndawde veizswnghsu B1、veiz- swnghsu B2 hamzliengh faenbied beij haeuxnaz sang 6 boix caeuq 3 boix. Daegbied dwg de hamz miz laianhsonh, haujlai vunz cungj siengj mbouj daengz de hamz miz gij doxgaiq neix.

Lwgmaenz mboujdanh yingzyangj lai, lij hamz miz haemq sang yihliuz baujgen goengnaengz, caemhcaiq ndaej yawhfuengz binghnyouhdangz dem. Yizbwnj yenzgiu yinzyenz yenzgiu fatyienh, duznou bizbwd baenz bingh- nyouhdangz gvaq haenx, gwn maenzhau 4 daengz 6 aen singhgiz le, yizdaujsu ndaw lwed faenbied doekdaemq 26% caeuq 60%. Yenzgiu yinzyenz lij fatyienh, lwgmaenz miz itdingh dingj binghnyouhdangz cozyung. Audili Veizyejnaz Dayoz miz hangh linzcangz yenzgiu ndeu fatyienh, boux baenz 2 hingz bingh- nyouhdangz gwn lwgmaenz le, gij yizdaujsu minjganjsing de ndaej daengz mizyauq gaijndei, mizleih hanhhaed hezdangz.