Vunz baez geq le, aenvih heiq- yiengz ciemhciemh nyiegdoiq, mbouj- danh rox gamjdaengz ndang in hwet naet、gen’ga naiq, heuj lij gojnwngz lonlat loenqdoek dem, neix couh dwg heiqyiengz mbouj gaeuq lo, wnggai daj bouj mak hainduj caeux di yawhfuengz, gwn maklaeq ndip couh dwg gij banhfap ndei ndawde aen ndeu.

Ngoenznaengz haethaemh boux- cungnienz caeuq bouxlaux dangh- naeuz ndaej gwn 5 daengz 10 aen maklaeq ndip, couh ndaej dabdaengz yawhfuengz caeuq ceihyw mak haw、ndang in hwet naet aen muzdiz neix lo. Danhseih boux dungx mbouj ndei gwn maklaeq ndip mbouj ndaej mauhgvaq 5 aen.

Maklaeq feih diemz singq raeuj, ndaej cauj gwn roxnaeuz dumq gwn, gwn de ndaej huz dungx cangq mamx. Aeu maklaeq caeuq haeuxsuen ngauz cuk, bouxlaux caeuq lwgnyez cungj hab gwn.

Guh yw gwn fap: Maklaeq caeuq gaeqnohndaem aeuq gwn.

Yenzliuh: Aeu 10 aen maklaeq, duz gaeqmeh nohndaem ndeu.

Guhfap: Maklaeq bok naeng aeu ngveih de bwh yungh, gaj gaeqnohndaem ciemz bwn cawz dungxsaej swiq seuq langh hawq. Dwk nohgaeqndaem caeuq maklaeq roengz guenqmeng bae, gya raemx mued gvaq nohgaeq caeuq maklaeq, caiq dwk gep hing ndeu roengz le goeb fa feiznumq aeuq 2 diemj cung, dwk di gyu ndeu, ceiq ndei gaej dwk veicingh gwn.

Ywyauq: Nohgaeqndaem ndaej nyinh yaem ik heiq, caemh ndaej bouj bwt mak. Maklaeq ndaej bouj mak nyangq nyinz.