Geij ik bi gaxgonq, digiuz okseiq lo. De miz aen ndang gyaeundei ndeu: Rij iq sawliklik, ndoengfaex mwncupcup, va homfwngfwng. Daxmeh heuh de “giuzgiuz”. Giuzgiuz vuedbued dwggyaez, singfwen gig diemz.

Hoeng mbouj geij nanz, giuzgiuz mbouj caiq ciengqgo lo, ndang de yied daeuj yied ca. Ngoenz ndeu haetromh, giuzgiuz lau dwk hemq naeuz: “Daxmeh, daxmeh! Byoem gou baenzlawz yied daeuj yied noix ne, lwgda gou hix yawj mbouj cingcuj lo, naj da mokmumu, raemxda nyaenx mbouj ndaej laeriri roengzdaeuj.” Daxmeh menhmenh lumh gyaeuj Giuzgiuz naeuz: “Daeglwg, nyaenx di ba, mwngz bienq baenzneix cungj dwg gyoengqvunz mbouj roxsoq cauhbaenz. Gyoengqde dawz byoem raeuz bae guh gyasei, heiqfeiq riengz giceh caeuq gunghcangj baiz ok heiquq liux, raemxuq gunghcangj hix sawj goekraemx cungj uq liux .” Giuzgiuz naiqnueknuek naeuz:“Daxmeh, gou gaenq daengx ndang sieng lo, gou caiq hix mbouj miz rengz ciengqgo, gou siengj ninz lo……”

Youq ndaw ninzcaem, Giuzgiuz mumjgyumq dingqnyi miz vunz cingq gangj vah: “Seiqhenz digiuz raeuz caiq mbouj guenjleix, couh caj ngoenzdai lo!……” Daj seizhaenx hwnj, couh hainduj miz vunz youq gwnz gyaeuj ndoqndatndat de ndaem faex, miz vunz swiq lwgda mokmumu de. Hoeng de daiq baeg lo, cengq mbouj hai da yawj.

Giuzgiuz ninz liux gig nanz gig nanz, dang de caiq cengq hai lwgda seiz, doeksaet lo. Yo! Yienzlaiz gwnz gyaeuj ndoqndatndat gaenq maj rim byoem na, de youh yawjraen aen seiqgyaiq gyaeundei ndeu: Dah iq sawliklik, ndoengfaex mwncupcup, roeg iq vaiqvued mbin. De angq hemq naeuz: “Daxmeh, daxmeh, bingh gou ndei lo!”

Daj seizneix hwnj, gyoengqvunz youh dingqnyi singfwen rwenz Giuzgiuz：“Mwngz dop it, gou dop it, aihu vanzging ceng daih’it; mwngz dop ngeih, gou dop ngeih, aihu va’nywj caeuq gofaex; mwngz dop sam, gou dop sam, mbouj aeu luenh baenj va caeuq nyangj; mwngz dop seiq, gou dop seiq, mbouj aeu dauqcawq gveng nyapnyaj; mwngz dop haj, gou dop haj, aihu vanzging guh baenaj.”

（指导老师：邓秀妮）