Ngoenz ndeu, douqlwg、noucoengzlwg caeuq lingzlwg sam boux siuj baengzyoux doxdax mbaet lwgmak, gyoengq doenghduz cungj daeuj yawj.

Lingzlwg mbaet ndaej lwgmak ceiq lai ceiq naek. Noucoengz boiqfug raixcaix, gangj: “Daeggo, mwngz rengz lai hw, mbaet ndaej aenmak hung- haenghaeng.”

Lingzlwg daekeiq naeuz: “Dangyienz lo, gou maj ndaej hung- sang, dangyienz lai rengz lo.”

Cienghlwg naeuz: “Duzlingz miz maz rengz? Mbouj beij lingzdaeuz gou bw.”

Lingzlwg mbouj fug, naeuz: “Rengz hung miz maz yungh, mwngz rox benz faex mbaet mak lwi? ”

Cienghlwg naeuz: “Gou mbouj yungh benz faex, couh ndaej gwn mak.” Gangj dwk, de byaij daengz laj gofaex, ngiengx gyaeuj yaengx diuz ndaeng raezramram hwnjdaeuj, baez aen baez aen, dawz mak gwnz faex gienj mbaet haeuj bak bae, gwncabcab.

Lingzlwg youh naeuz:“Mwngz rox benz hwnj faex bae naenghliengz lwi?”

Cienghlwg naeuz: “Gou vihmaz aeu benz hwnj faex bae naenghliengz ne, gou roengz raemx bae cimq mbouj engq liengz ma?”

Songde mwngz coenz gou coenz, boux mbouj fug boux.

Yiengzbya daxgoeng riunyum- nyum naeuz:“Yienghneix ba, sou doxdax, yawj byawz hingz bouxlawz.”

Yiengzbya daxgoeng naeuz: “Doiqnaj dah gwnz gofaex hung haenx miz haujlai lwgmak youh diemz youh rang, sou byawz bae mbaet ndaej ma couh suenq hingz.”

Cienghlwg sikhaek dangh gvaq dah, youz daengz doiqnaj hamq.

Lingzlwg raen cienghlwg gvaq dah, gip ndaej ngvaix rwz nyauj gemj, duzlingz mbouj rox youz raemx ne.

Cienghlwg angqvauvau buet daengz laj gofaex, de ndiengq din hwnjdaeuj, iet ndaeng raezrangrang, hoeng, baenzlawz hix gienj mbouj daengz lwgmak. De hozndat lo, yungh ndaeng bae gienj ganj faex, ganj faex daiq hung, gienj mbouj doh, de haenqrengz bengq ha bengq, ganj faex cix mbouj doengh saekdi. De caiq yungh din dik, yungh ndang gingx, cungj mbouj doengh, de doeknaiq dauqma lo.

Lingzlwg raen cienghlwg fwngz hoengq dauqma, cam: “Vihmaz mbouj mbaet mak ma ne?”

Cienghlwg najhoengz naeuz: “Gou mbouj rox benzfaex, mbaet mbouj daengz.”

Lingzlwg naeuz:“Gou mbouj rox youz raemx, gvaq mbouj ndaej dah. Danghnaeuz gou gvaq ndaej dah couh ndaej benz faex mbaet lwgmak lo.”

Cienghlwg naeuz:“Gou doz mwngz gvaqbae ba.”

Yienghneix, lingzlwg dawz aen daehndaij hunghaeng ndeu,diuq gwnz laenghwet duzciengh lwg bae. Ciengh- lwg doz lingzlwg guhdoih daeuj daengz laj gofaex. Lingzlwg benz hwnj gofaex, mbaet mak ndek roengz hawj duzciengh lwg, cienghlwg oet haeuj daeh bae.

Lingzlwg caeuq cienghlwg dauq- ma lo. Songde daiq ndaej daeh mak rim ndeu dauqma，gyoengq doih angq dangqmaz.

Yiengzbya daxgoeng cam daih- gya: “Bouxlawz ak ha?”

Daihgya han: “Cungj ak!”

“Vihmaz ne?”

“Song boux ak gya hwnjdaeuj engqgya ak!”

Yiengzbya daxgoeng riuhwhw naeuz: “Deng lo, doxgiet hwnjdaeuj, dox bang cij caen ak daihraix!”

（Ganh Sozvwnz/甘说文 hoiz）