Ngoenz ndeu, youq ndaw cangj cujlij nyapnyaj, aen siengnyapnyaj ndawsingz caeuq aen siengnyapnyaj lajmbanj doxbungz lo, gyoengqde swnhbienh gangjgoj hwnjdaeuj.

“Baengzyoux, mwngz daj giz- lawz daeuj?”

“Gou daj lajmbanj daeuj, mwngz ne?”

“Gou daj ndawsingz daeuj. Yi! Gaxgonq gou vihmaz mbouj raen mwngz gvaq ne?”

“Haha! Seizhaenx lajmbanj caengz miz siengnyapnyaj ne!”

Song aen siengnyapnyaj gag gangj hwnj gyoengqde yawj daengz vanzging bienqvaq lajmbanj caeuq ndawsingz.

“Gaxgonq, lajmbanj caengz miz siengnyapnyaj, nyapnyaj dauqcawq luenh gveng, vanzging veiswngh gig ca. Baez bongj rumz, ceijfeiq caeuq daehsuliu youq gyang mbwn mbinbyangbyang. Daj guh ‘Gyaeundei Gvangjsih, cinghseuq ranzmbanj’ hozdung le, yiengh- siengq lajmbanj moqsaksak. Vunz ndaw mbanj lij dingh miz mbanjgvi minzyoz, moix ranz gag baetseuq najranz caeuq laengranz swhgeij, loh ndaw mbanj caeuq dieg goengyungh moix ngoenz cungj miz cienvunz baet. Cwngfuj lij hawj moix aen mbanj boiq aen siengnyapnyaj hung ndeu.”

“Dwg caen lwi? Yo! Siengj mbouj daengz lajmbanj seizneix hix yawjnaek vanzbauj lo!”.“Daeggo ha! Mwngz gaej caiq yungh lwgda gaeuq bae yawj lajmbanj lo, seizneix lajmbanj caeuq ndawsingz mbouj miz maz mbouj doengz, loh ndaw mbanj dwg loh suijniz seuqsat gvangqlangh, caemhcaiq ranzranz cungj guh baenz ranzlaeuz lo.”

“Gizsaed gaxgonq, ndawsingz vanzging veiswngh hix mbouj ndei. Yienznaeuz dou caeux couh youq ndawsingz an’gya, hoeng moix ngoenz ndaw dungx dou cungj dienz mbouj imq.”

“Baenzlawz cix dienz mbouj imq?”

“Aenvih miz haujlai vunz cungj mbouj cujdung dawz nyapnyaj gveng haeuj ndaw dungx dou. Cigndaej hoh dwg, seizneix, vunz ndawsingz vanzbauj yisiz gyagiengz lo, moix ngoenz dungx dou cungj dienz ndaej gig rim, ndawsingz gizgiz cungj seuqsatsat.”

“Ha! haha！‘Gensez gyaeu- ndei Cungguek, gensez gyaeundei ranzmbanj, liz mbouj ndaej gyoengq beixnuengx siengnyapnyaj raeuz.”

Giceh hai doengh lo, song aen siengnyapnyaj youh riengz giceh bae gizdieg sihyau gyoengqde, laebdaeb vih “gensez gyaeundei Cungguek, gensez gyaeundei ranzmbanj” guh gungyen. （指导老师：邓秀妮）