Miz seiz gou gamjdaengz swhgeij lumj duz roegiq ndeu, siengj mbin, hoeng baenzlawz hix mbin mbouj sang. Doxnaeuz miz ngoenz ndeu gou douh youq gwnz nyefaex dauq bienq baenz muzbyauh bouxdwknyaen, gou mbin daengz gwnz mbwn cix fatyienh swhgeij daj seizneix mbouj miz baengh lo……

Ai! Yienzlaiz gou hix miz aen ranz vuenyungz ndeu. Hoeng, baez fangzhwnz dwglau ndeu sawqmwh haeujdaeuj, hawj gou mbouj miz ranz youq. Ngoenzhaenx, mbwn gvengq, ndit rongh ndei, daengx ranz dou cingq gwn mak. Sawqmwh, aenranz saenqdoengh hwnjdaeuj. Daxboh nyinh- naeuz fatseng deihdoengh lo, byaij daengz bakdou baez yawj, cijraen boux vunz ndeu cingq “vwng vwng vwng……vwng vwng vwng……” dwk gawq aen ndang goenglaux gofaex. Goenglaux gofaex hemq ndaej gig camj gig sim’in. Daxboh heuh dou gaenjgaep deuz mingh, hoeng, baez yaep ndeu, mbwn baenq deih cienq, gou aenvih doeksaet couh maez gvaqbae.

Dang gou singj daeuj seiz, cingq gutgungq youq ndaw rungj daxmeh, gij rungj daxmeh gou lwedbwed dwk, gou gig siengsim, cuengq sing daej hwnjdaeuj “daxmeh,daxmeh……” A! Dou saetbae aen ranz yienzlaiz lo. Daengx benq gofaex deng raemj liux lo, go’nywj gaenq lumj gij bohliz soiq nei, dujva hix lumj daengx ndang max deng faen baenz haj…… Yawj daengz daengx aen ranz vaihvadvad, gou gig siengsim, vihliux lix diuz mingh, gou cij ndaej deuz ok ranz.

Gou youq gwnzmbwn mbin le gig nanz, gig nanz, gou dungx iek goenjlulu, mbouj miz rengz, cij gamjdaengz daengx ndang saenz mbouj dingz, doeklaeng gou couh mbouj rox nyinh gijmaz lo. Dang gou caiq baez singj daeuj seiz, fatyienh swhgeij youq ndaw ranz boux guhhong ndeu, yienzlaiz dwg bouxvunz simndei ndeu gouq gou.

Gou youq ndaw ranz moq neix gvaq saedceij geij ngoenz, miz ngoenz ndeu, bouxcawjiq doiq gou gangj: “Ndangdaej mwngz seizneix hoizfuk ndaej gig ndei, mwngz mbin baema ba, daswyenz cix dwg ranz mwngz.” Dingq le gij vah neix, gou gig gamjdoengh, dotdot ndaw fwngz bouxcawj, youh ma daengz gwnz mbwn maqmuengh gou, caen geizheih ya, ngoenzneix mbwn daegbied lamz, fwj daegbied hau, gou diemheiq laeg dwk, caen cwxcaih ya! Gou ngaem gyaeuj baez yawj, ngoenzgonq, gij hoenz ndaw gunghcangj baiz ok haenx gaenq bienq seuqsat lo. Gou gig siujsim dwk yiengq baihlaj mbin bae, gwnz haw gehhongh seuqsat raixcaix. Gou laebdaeb mbin bae naj, hi, bang vunz ndeu cingq nyaengq dwk baet loh iq ne.

Yienzlaiz gyoengqde cingq gaihcanj gij hozdung ranzmbanj gyaeundei. Gou mbin ya mbin ya, mbouj roxnyinh couh mbin daengz ranz gou lo. Seizneix, gyoengqvunz vihliux bouj gij loek swhgeij, cingq ndaem faex caux dieg ndoeng ne. Gou saenq gvaq mbouj geij nanz, gizneix youh dwg gizdieg heuswdswd ndeu. Ye! Gou youh miz ranz moq lo, gou youh miz ranz moq lo!

(指导老师：玉洁)