Ngoenzneix gou yaek haenhhaenh boux doengzhag ndeu. Boux doengzhag neix, heuhguh Lij Fangh. De bineix cib bi lo, mbouj sang mbouj daemq, doiq lwgda ronghsagsag, aen ndaeng iqetet, gwnz naj maj miz aen cenjlaeuj ndeu, baez riu hwnjdaeuj diemzsisi. De mboujdanh yozsiz ndei, caemhcaiq sim gig ndei.

Geiq ndaej miz baez ndeu cuengqhag, gou caeuq Lij Fangh caez byaij youq gwnz loh baema ranz. Sawmwh, dou fatyienh miz duz malwg ndeu ninz youq gwnz loh saenzdedded. Lij Fangh sikhaek byaij gvaq henz duz malwg bae yawj, yienzlaiz duz malwg neix din deng sieng, byaij mbouj ndaej lo. Lij Fangh raen daengz yienghneix, coenz vah ndeu hix mbouj gangj, couh umjdawz duz malwg ma ranz. Daengz ranz le, de sien bang malwg suek gizsieng, caiq bang malwg swiq ndang. Daxmeh de raen le, ndatheiq naeuz: “Mwngz bae gizlawz gip ndaej duz malwg neix ma, vaiq cuengq de okbae bw.” Lij Fangh gouz daxmeh naeuz: “Daxmeh, duz malwg neix din deng sieng lo, raeuz couh louz de youq ranz raeuz ba!” Daxmeh de mbouj han, Lij Fangh rox daxmeh mbouj doengzeiq lo. Yienghneix, de couh dawz duz malwg cang youq ndaw loengxceij, laeglemx cuengq youq aen gungx lajlae mbouj miz vunz raen haenx, yienghneix de couh ndaej moix ngoenz ciuqgoq malwg lo. Hoeng, gienh saeh neix mbouj geijnanz couh deng daxmeh de rox lo. De cijndaej doiq daxmeh gangj dauhleix: Gijmaz gyaezhoh dungvuz la, gijmaz malwg gig hojlienz lai……Doeklaeng, daxmeh de dauqdaej deng de gangjfug lo. De riu lo, riu ndaej gig diemz.

Lij Fangh doengzhag baenzneix gyaez doenghduz caen cigndaej raeuz yozsiz. (指导老师：罗 凤)