Ngamq cuengqhag, gwnzmbwn sawqmwh laep roengzdaeuj, lumj deng vunz yungh raemxmaeg swiq gvaq nei. Baez yaepda, rumz hung bongj daeuj, sing goenjhuhu, ci daengz gwnz mbawfaex, fatok sing yiengj hung, couh yaek doekfwn lo.

Yawjdaengz gijneix, gou simgip lumj feiz coemh, lienzmuengz buetok bakdou hagdangz, cijraen bakdou hagdangz luenh baenz dong ndeu. Gou gaenjcieng dwk yiengq seiqfueng muengh yawj, hoeng ra mbouj raen daxbuz, ndawsim gou lau raixcaix. Gou mbouj caj raen daxbuz couh riengz doihvunz yiengq ranz daxbuz byaij bae.

Byaij daengz bakdou ranz daxbuz, cijraen fajdou gven gaenj lo, gou yunghrengz roq fajdou, caenh dingqnyi sing roq, cix dingq mbouj ok ndaw ranz miz saekdi singyaem. Daxbuz ranz- nden okdaeuj doiq gou naeuz: “Daxbuz mwngz caeux bae hagdangz ciep mwngz lo.” Dingq daengz coenz vah neix, gou ngaezngwd lo, youq ndaw hagdangz gou vihmaz mbouj raen daxbuz gou ne?

Seizneix, henzmbwn youh yiengj hwnj sing byajraez daeuj, doek fwnraq lo. Gou lumj raen daxbuz ndwn youq ndaw fwn simgip dwk ra gou nei. Gou lienzmuengz yiengq ranznden ciq ndaej aen liengj ndeu, dauqbae hagdangz ra daxbuz.

Byaij daengz bakdou hagdangz, gou yawjdaengz naj bakdou vunz noix lo, mbouj lumj haxbaenh baenzhaenx luenh. Aenvih gyoengqvunz cungj daenj buhyijyih, gang liengj, gou cijndaej ndonj gvaq gyoengqvunz bae ra daxbuz, danhseih lij ra mbouj raen daxbuz.

Fwn yied doek yied hung, rumz yied bongj yied haenq, liengj gou deng rumz ci vaih lo, buh dumz lo. Gou simgip raixcaix, buet haeuj ndaw hagdangz bae ra daxbuz. Gou youq gwnz cauhcangz ra, hix ra mbouj raen daxbuz, gou gip ndaej raemxda cungj lae roengzdaeuj lo.

Sawqmwh, henz rwz gou cienz daeuj gij sing youh sug youh gip haenx: “Siujhoengz, mwngz bae gizlawz la? Gou dauqcawq ra mbouj raen mwngz.” Gou cienq ndang daeuj yawj, yienzlaiz dwg daxbuz, cijraen gwnz naj de cungj dwg raemxfwn, buhvaq hix dumz lo, fwngz swix gwed aen liengj ndeu, fwngz gvaz lij gaem aen liengj caengz hai ndeu, aen liengj neix dwg soengq daeuj hawj gou a. Gou hemq dwk “daxbuz”sing ndeu, raemxda couh gag lae roengzdaeuj lo. Daxbuz gipmuengz byaij gvaqdaeuj umj gou, gou lienzmuengz yungh liengj bang daxbuz dangj fwn hung.

Fwn lij doek, rumz lij bongj, gou caeuq daxbuz gwed liengj ma ranz. Youq gwnz loh, gou cam daxbuz:“Daxbuz, mwngz nit lwi?” Daxbuz gangj:“Mwngz ne? Gou mbouj nit.” Dingq daengz vah neix, raemxda gou youh nyaenx mbouj ndaej doek roengzdaeuj lo.

Daxbuz, gou gyaez mwngz!

(指导老师:罗少维)