Nazboh Yen daj 2008 nienz daeuj, youq ranghdieg henzguek 20 goengleix dauqndaw cienzmienh saedhengz“hwng bien fouq minz” gihcuj sezsih gensez, gonqlaeng saedhengz goengloh、vunz nem doihduz gwnraemx、ranzyiemj gaijguh、daemzcaujgi、diegdeih cingjleix、veiswngh、gyauyuz、gvangjbo densi daengj 12 daih loih 8801 aen hanghmoeg, gungh roengzngaenz 1.78 ik maenz. Hanghmoeg guh doh 6 aen yanghcin 59 aen cunh 680 aen mbanj 17965 hoh 77246 vunz. Gij hanghmoeg neix guhbaenz ndaej yungh le, mizyauq dwk hawj gyoengqvunz ranghdieg neix ndaej gaijgez byaij roen hoj、ranzyouq hoj、haeujhag hoj、yawjbingh hoj、gwnraemx hoj、yungh dienh hoj、soudingq(yawj) gvangjbo densi hoj daengj vwndiz.

Ciuq cam rox, youq baez 2014-2015 nienz fuzbinz haifat neix, aen yienh neix roengz 1.852 ik maenz, saedhengz 114 aen hwng bien fouq minz hanghmoeg. Daengz dangqnaj, gaenq guhsat 62 aen hanghmoeg, ciemq cungjsoq 54.4%; gij hanghmoeg cingq saedhengz nem cingq yaek saedhengz、dajsuenq saedhengz de miz 52 aen, ciemq cungjsoq 45.6%.

(Liengz Swng/梁 盛)