●Bineix， Sanhgyangh Dungcuz Swciyen Linzhih Yangh Yazgij Cunh ndaej cienzngaenz fuzbinz 300 fanh maenz, aeu daeuj gag ung dinfaex gocaz、vat roen guh canjyez nem bangfuz boux ndaem caz daengj, doenghgij dinfaex gocaz yaek soengq hawj aen cunh neix ndaem 2000 lai moux suencaz, haenqrengz dajcaux aen cunh neix baenz aen cunh lijyouz moq comz miz vwnzva caz、minzsuz funghcingz nem nungzyez ngonz- yawj.

(Gungh Bujgangh)

●Daj bineix daeuj, Lungz- swng Gak Cuz Swciyen aeu saedhengz“vwnzva hwng yienh”guh gihvei, laeb minzcuz vwnzva vunzcaiz sinsizgu. Aen sinsizgu neix souhaeuj doenghgij vunzcaiz minzcuz vwnzva baugvat guh ndangdaenj minzcuz、yienjok yozgi minzcuz、doenghyiengh minzcuz fwngz guh daengj 6 loih 92 boux.

(Vangz Yungjfeih)

●Dangqnaj, Cauhbingz Yen Senhveiz Yauzcuz Yangh gaenq guh baenz raetmoegngaex sifan gihdi 300 moux, bi ndaej sou raetmoegngaex 180 dun, gai ndaej 1200 fanh maenz.

(Liuz Feih)

●Bineix, Yungzsuij Myauz- cuz Swciyen Swyungz Yangh Yungzdi Cunh youq ndaw gihdi lwgmak gwnz bya cab ndaem byaekgwn, gungh dajndaem lwgmanh 400 lai moux, guj ndaej sou lwgmanh mauhgvaq 50 fanh goenggaen.

(Liu Swngyinz)

●Gaenh bi daeuj, Lingzyinz Yen Ya’gyaz Yangh Bingzvaiz Cunh haenqrengz ndaem gosangh ciengx nonsei. Dangqnaj, aen cunh neix miz suen gosangh 7000 lai moux, moix bi gij ranz ciengx nonsei ceiq lai de ndaej 11 buek, ranz ciengx nonsei moix boux souhaeuj 7000 maenz doxhwnj.

(Siuh Fazlingz)