Seizdoeng haetcaeux, douqiq baez hai dou, va, roengz nae lo! Gwnz dieg haujlai nae, hausaksak, gwnz mbwn lij mbinyaengyaeng doek nae mbouj dingz. Douqiq angqvauvau bekfwngz riuhaha, diuq ndaw dieg nae bae rouxringx. Seizneix, cingqngaemj miz gaiq nae ndeu doek youq gwnz bwndaraemx de bae, de cim dwk, fatyienh gaiq nae lumj miz gak nei. De ngeiz lo: “Nae mbouj dwg luenzlulu ma? Nanzdauh nae lij miz gak? Daiq geizgvaiq lo.” De cingq siengj caiq yawj cingcuj di, gaiq nae couh sikhaek bienq baenz raemx ndik roengz dieg bae lo. De youh iet fwngz bae coux gij nae daj gwnz mbwn doek roengzdaeuj haenx, hoeng, cungj mbouj caj de yawj cingcuj couh bienqbaenz caw raemx lo. De ngeix: “Gij nae dauqdaej dwg baenzlawz yiengh ne? Gou aeu bae cam cam bouxwnq cij ndaej.”

Douqiq ngi’nged ngi’nged caij nae bae ranznden cam duzma: “Ma daeggo, gij yienghceij nae dauqdaej dwg baenzlawz yiengh ne?”

Duzma gvaekgvaek gyaeuj douq- iq, naeuz: “Huk lai lo, nae baenzlawz yiengh cix mbouj rox! Yawj gwnz dieg, gij nae neix mbouj dwg lumj mba hausaksak ma?”

Douqiq mbouj muenxeiq gij dapanq duzma, de youh bae ra doengzdoih wnq.

Douqiq raen duzmeuz caeuq duzgaeq cingq youq gwnz dieg nae guhcaemz, couh buet gvaq bae cam songde:“Meuz dahcej, gaeq dah- nuengx, sou rox nae dauqdaej dwg baenzlawz yiengh lwi?”

Duzmeuz caeuq duzgaeq baez dingq couh riu sisi sese. Duzmeuz naeuz:“Douq daegnuengx, mwngz yawj!” Gangj le couh youq gwnz nae caij mbat ndeu, yinx gij yaenq din swhgeij naeuz:“Neix couh dwg gij yienghceij nae lo, lumj duj vamoiz ndeu.” Duzgaeq hix caij nae mbat ndeu, naeuz: “Yawj, hix lumj mbaw go’ndoek ne.”

Douqiq gig saetmuengh, de bae daengz ranz cam duzvaiz:“Vaiz daxau, mwngz rox nae dauqdaej dwg baenzlawz yiengh lwi?”

Duzvaiz naeuz: “Gou mbouj rox, mwngz bae cam yiengzbya daxgoeng ba, lauheiq de cij rox lo. ”

Douqiq byaij le haujlai nanz cij daengz ranz yiengzbya, de roqroq dou, cam:“Yiengz daxgoeng, mwngz rox nae dauqdaej dwg baenzlawz yiengh lwi?” Mbouj miz saek sing han. Yienzlaiz yiengzbya okdou bae lo.

Mbwn caen nit ha! Duzdouq nit ndaej saenzdedded, hoeng, de siengj rox nae dauqdaej dwg baenzlawz yiengh, itdingh aeu caj yiengzbya dauqma cam cingcuj, couh naengh youq gwnz rin bakdou caj.

Yiengzbya daxgoeng dauqma lo, douqiq angq coux gvaqbae, cam: “Yiengz daxgoeng, mwngz rox nae dauqdaej dwg baenzlawz yiengh lwi?”

Yiengzbya haenh naeuz: “Caen dwg laeq lwgnyez gaenx hag gaenx cam ndeu!” De haidou cingj douqiq haeuj ranz le, ndenq hawj de aen fangdaging ndeu, naeuz:“Gaenx hag gaenx cam, gaenx ngeix gaenx gvanhcaz, couh ndaej rox haujlai doxgaiq. Mwngz gag bae yawjyawj ba.”

Douqiq gaenjgip dawz fangdaging bae yawj nae. Baez ciuq, angq ndaej yaek diuq hwnjdaeuj. Va, youq laj fangdaging, gijmaz cungj yawj ndaej gig cingcuj, gij nae couh lumj duj vamoiz roek gak, lumj duj valinzgaeq miz roek diuz sei yungzyubyub …… Caen gyaeundei ha.

Douqiq dauqdaej rox nae dwg baenzlawz yiengh lo! De angqvauvau buet dauqma lwnh doengdoih nyi.

（Ganh Sozvwnz / 甘说文 hoiz）