Yinzhoz Siujyoz dou youq ndaw byalaeg, baedauq mbouj fuengbienh, cijmiz diuz daihloh ndeu, namhsa mbinfoenfoen, mboujmiz ci byaij, ndigah haujlai lauxsae diegrog mbouj nyienh daeuj gizneix son saw. Ngoenzneix dauqdaej ciepdaeuj boux lauxsae moq ndeu daj yienhsingz daeuj, gij siusik neix youq ndaw yozyau cienz okbae, daihgya lwnh mbouj dingz. Engq hawj gou angq dwg, boux lauxsae neix dwg daeuj son yijvwnz dou, lij dang banhcujyin dou. Gyoengq doengzhag angq raixcaix.

Lauxsae moq hawj dou hwnj dangzgo daih’it gingq- yienz dwg cozvwnz cijdauj go. Gij fuengfap sonhag de gig moq, daj ndaw gangjvah yinxok sijfap, hawj dou mbouj rox mbouj yinh couh rox sij cozvwnz lo. Hwnjdangz le, lauxsae couh gangj:“Gyoengq doengzhag, gangjgangj sou gamj daengz gou baenzlawz yiengh, gangj ndei、gamgj rwix cungj ndaej, hoeng itdingh aeu gangj vahcaen, lauxsae cij angq.” Haidaeuz, ndaw gyausiz saek sing cungj mbouj miz, byawz cungj mbouj gamj gangj, doeklaeng lauxsae gujli lai baez, gyoengq doengzhag gamj gangj lo. Hoeng coenzvah miuzsij dou cungj dwg bingzbingz ciengzciengz, mbouj miz vah ndei. Lauxsae youh cijdauj dou baenzlawz gangjvah cij sengdoengh caensaed. Fanghfangh gangj:“Lauxsae moq miz di sang, miz di byom, lwgda miz di iq, bak miz di iq.” Lauxsae riunyum dwk gangj: “Mwngz miuzsij ndaej gig caensaed, hoeng danghnaeuz lij gya di swzyij ndei couh engq ndei lo. Mwngz dwg mbouj dwg yienghneix sij: Lauxsae moq ndang de youh sang youh byom, lwgda yienznaeuz iq hoeng gig lingzvued, aen bak yienznaeuz iq caemhcaiq lij rox gangjvah ne.” Gyoengq doengzhag cungj haenh, cibfaen boiqfug cozvwnz cijdauj sijfap lauxsae, boiqfug de miz dungxcaiz lai, naengz aj bak baenz faenzcieng. Doenggvaq lauxsae cijdaeuj, dou dauqdaej sij ok bien faenzcieng ceiq raez, ceiq ndei ndeu. Seizgan ndei cungj dwg gig dinj, mbouj rox mbouj nyinh couh roengz dangz lo, hoeng gyoengq doengzhag roengzrengz hag sij cozvwnz lij mbouj caengz siu.

Docih cwngcwz ndei gungcanjdangj, seizneix, Yinzhoz Siujyoz raeuz cingq guh diuz loh suijniz gvangqlangh bingzrwdrwd ndeu. Gou saenq, ndawbya raeuz itdingh ciepdaeuj engq lai lauxsae ceiq ndei, hawj lwgnyez ndawbya raeuz hix lumj lwgnyez ndawsingz yienghhaenx, souh daengz gyauyuz ndei. （指导老师： 覃月素）