Ngoenz ndeu, goenglaux daj ndaw suenmak mbaet geij aen makgam, daiq aemj、lwgmanh、duhcauj, daenj mauh aemq cungq hwnj bya bae dwknyaen.

Goenglaux byaij le haujlai nanz, duz nyaen ndeu cix caengz raen, de gaenq baeg lo.

Goenglaux daeuj daengz aen ndoengfaex ndeu, ra go faex hung ndeu, ai bangx goek gofaex naengh roengzdaeuj, caiq duet mauh, got maenh fagcungq yietnaiq.

Yaep he, goenglaux ninz ndaek lo. Duzlingz ndeu yawjraen le, yaemzyaemz gvaqdaeuj dawz aen mauh goenglaux bae daenj, hag gij yienghceij goenglaux byaij ha byaij, hoeng, aen gyaeuj de iq lai, aen mauh cungj daenj mbouj maenh, mbouj byaij geij yamq couh doek roengzdaeuj. Lingh duz lingz raen le, sikhaek ciengj dawz bae daenj lo.

Baenz gyoengq duzlingz mwngz ciengj gou duet, doxceng daenj mauh, buet huhu vava, swenj cici cece, cauz ndaej goenglaux ndiu dauq lo.

Goenglaux mbouj heiq mbouj ak, riunyumnyum yawj gyoengq lingz, gamjdaengz gyoengqde youh manz youh dwggyaez, couh lumj gyoengq lwgnyez nei.

Yaep he, goenglaux mbon makgam okdaeuj doeg limq mbaet gwn. Gyoengq lingz yawjmyoegmyoeg. Goenglaux vad fwngz heuh gyoengqde gvaqdaeuj, gyoengqde youh mbouj gamj gvaqdaeuj gyawj. Goenglaux dawz geij aen makgam gveng gvaqbae, duzlingz couh dox ciengj dawz bae, caemhcaiq hag yienghceij goenglaux limq doeg limq mbaet gwn.

Goenglaux dawz umj caeuq lwgmanh okdaeuj, aeu lwgmanh songq aemj gwn. Gyoengq lingz youh daeuj lai gyawj lo, duzduz doiq goenglaux yawjmyoegmyoeg, ndwnj myaiz goeggoeg. Goenglaux ndek aen lwgmanh nding gvaqbae, duz lingz ndeu ciengj dawz le couh oet haeuj bak bae, baez gaet, manh ndaej aj bak ci rumz haha, sikhaek vut lwgmanh. Gyoengq lingz youh nyoengx bae ciengj aeu, miz duz ndeu ciengj ndaej dawz, yawj yaep he couh dwk haeuj bak bae nyaij, manh ndaej swenj cece, diuq yiyi yukyuk. Goenglaux yawj le, angq ndaej riuhaha.

Goenglaux maengx gyoengq lingz, de youh daj ndaw daeh mbon duhcauj okdaeuj, bongh haeuj ndaw bak bae gwn yiengj “gyaebgyaeb”, duzlingz youh daeuj gyawj di lo. Goenglaux dawz geij naed duhcauj samj gvaqbae, gyoengq lingz cungj ceng gip bae, hix bongh haeuj bak bae gwn yiengj “gyaebgyaeb”.

Goenglaux fwt siengj daengz, swhgeij youq laj dinbya ndaem miz haeuxyangz, haeuxyangz gaenq ndaej sou lo. De yawjyawj gyoengq lingz baenzlai dwggyaez, riu lo.

Goenglaux mbouj dwknyaen lo, sikhaek aemq cungq hwnj daeuj byaij dauqma. De doq byaij maranz, doq seiz mbouj seiz ndek geij naed duhcauj, duzlingz gaen dwk goenglaux, ciengj gwn duhcauj. Yienghneix, soh ma daengz laj dinbya.

Goenglaux youq gyaeuj reih cug maenh geij aen loz, haeuj ndaw reih bae, mbaet haeuxyangz roengzdaeuj, gaeuh ndaw loz bae. Gyoengq lingz yawj le, hix duz gaen duz gvaqdaeuj, byaij haeuj ndaw reih bae, mbaet haeuxyangz roengzdaeuj, gaeuh ndaw loz bae.

Mbouj geijlai nanz, daengx gaiq reih haeuxyangz mbaet liux lo.

Gyoengq lingz bang goenglaux guh le haujlai hong, goenglaux angq dangqmaz.

（Ganh Sozvwnz / 甘说文 hoiz）