Ngoenzneix, daxboh naeuz daiq gou bae yihyen bouj heuj, hoeng gou baenzlawz cungj mbouj siengj bae. Aenvih gou nyinhnaeuz bouj heuj in lai, gou lau in. “Mbouj ndaej, mwngz itdingh aeu bae, mboujnex heuj baenz non baenzlawz guh?” Daxboh naeuz.

Haeuj ndaw yihyen le, aen sim gou couh diuqbubbub, lumjbaenz miz vunz youq henz rwz lwnh gou:“Bouj heuj in lai, bouj heuj in bw!”Lwnz daengz gou lo, canghyw genjcaz gij heuj gou le, naeuz:“Miz song diuz heujnon lo， aeu bouj cijndaej.” Dingqnyi coenz vah canghyw le, gou saenzdedded dwk naeuz:“Canghyw ha, mwngz gaej yungh rengz nw, gou lau in.”Canghyw riunyumnyum naeuz:“Mbouj lau law, mwngz mbouj luenh doengh couh mbouj in!”

Bouj heuj lo! Canghyw dawzok gij hongdawz geizheih he couh hainduj lo. De aeu aengeng he mbehai aen bak gou, caiq yungh fagngaeu song gyaeuj youh soem youh goz haenx dok heuj, youh yungh feicuenq cuenq gij heujnon, gaendwk youq bak heuj demh geij gaiq faiq. Gou yawjraen canghyw yaengx hwnj dienhcuenq. Gou lau raixcaix, lienzmuengz cam canghyw:“In mbouj in ha？”Canghyw naihsim dwk naeuz:“Mbouj in! Mbouj in!”De doq gangj doq siudoeg gij heuj gou, ndaw bak gou sawqmwh miz di soemj he, yi, dwg guh maz lo? Gou cingq naemj dwk, caenh dingqnyi canghyw naeuz:“Hwnq lo, heuj mwngz bouj ndei lo.”“Bouj gvaq la? Baenz vaiq ha?”Gou cungj ngawz liux. Daxboh riu naeuz:“Ndei lo, ndei lo, dou baema ranz lo.”

A, laxlawz bouj heuj mbouj itdingh in ne!

(Sugij hoiz)