Daxmeh, docih mwngz vihliux hawj gou ndaej maj hung maj cangq, ngoenznaengz gwn haemz gwn hoj.

Geiq ndaej miz baez he, gou fat ndat baenz 40 doh, daxboh geij ngoenz haenx dingjlingz okcai mbouj youq ranz. Daxmeh gip lumj duzmoed youq ndaw rek ndat nei mbouj rox baenzlawz cij ndei. Byonghhwnz youh ra mbouj ndaej ci, daxmeh caenhndei aemq gou buet bae yihyen. Mbouj rox gvaq le geijlai nanz, gou dingqnyi daxmeh hemq naeuz:“Canghyw, vaiqdi daeuj yawjyawj dahlwg gou.”Gou cij rox daengz yihyen lo. Gvaqlaeng daxmeh youh bang gou aeu yw, youh bwnq gou gwn yw, nyaengq daengz haetcaeux. Banhaet mwh bingh gou haemq ndei le, daxmeh cij ndaej soeng gaemz heiq he.

Daxmeh mboujdanh youq gwnz swnghhoz gvensim gou, lij gig gvensim gij hagsib gou dem. Mwh gou bungz daengz giz mbouj rox, daxmeh cungj naengh daengz henz ndang gou, caeuq gou sijsaeq faensik gij daezmoeg haenx, ra ok haujlai cungj fuengfap bae dap gij daezmoeg haenx.

Vihliux sawj gou sij ndei cozvwnz, daxmeh gingciengz daiq gou bae duzsuhgvanj ciq saw doeg saw, lij ciengzseiz bae bouqsaw cawx saw hawj gou doeg dem, seizneix, gou sij cozvwnz yungzheih lai lo, hix sij ndaej ngoenz beij ngoenz ndei.

Miz daxmeh gvensim, ndaej daxmeh henhoh, gou baenz boux lwgnyez gwnz seiqgyaiq ceiq vuenyungz ndeu.

Daxmeh, gou gyaez mwngz!

(Sugij hoiz)